امریکی اسٹیٹ ڈپارٹمنٹ ءِ سال ءِ گزارش ءِ رد ءَ بلوچستان ءَ زوریں بیگواھی، سیاسی کارکنانی درکانودی کوش، پاکستانی لشکر ایپ سی ءِ زوراکی، ھرنائی ءَ زھرشانی کنوکانی سر ءَ تیرگواری کنگ، دامگ ءِ بند کنگ ءَ ھوار رسانکدر ءُ این جی اوزانی سر ءَ پابندی جنگ بژن لیکگ بیتگ۔
اسٹیٹ ڈیپارٹمنٹ ءِ سال ءِ گزارش ءِ تہ ءَ پیشگیں مزن وزیز امران ھان ءِ سرکار ءِ ھلاسی ءَ پد زھرشانی کنگ بیتگ ءُ روانک ءِ ھواری ءَ 2022 ءَ دیم ءَ آتکگیں بازیں وئیلانی گپ کنگ بیتگ۔
گزارش ءِ رد ءَ پاکستان تھریک انساپ ( پی ٹی آئی ) ءِ سرکماش امران ھان ءِ ٹاپارانی گپ کنگ بیتگ کہ اسلام آباد ءِ نیمگ ءَ روگ ءَ بیتگیں روانک بنجاھی سرکار ءَ روگ ءَ نیشتگ ءُ اڈاند ودی کنگ بیتگ ءُ زھرشانی کنوکیں مردمانی سر ءَ اَرسی گیس جنگ بیتگ ءُ دزگیر کنگ بیتگ اَنت۔
آئی ءَ دیمتر ءَ گوشتگ کہ بلوچستان ءَ پاکستانی لشکر ایپ سی ءَ ھوار آئی چیریں ادارہ مردمی اگبالانی لپاشگ ءَ ھوار اَنت۔ زور بیگواھی ءِ دْرچ چہ بازیں سالاں برجاہ اِنت، بلے 26 اپریل ءَ چینیانی سر ءَ پدائی اُرش ءَ پد اے وئیلانی تہ ءَ یکبرے پد ءَ گیشی آتکگ۔ گزارش ءِ تہ ءَ گوشگ بیتگ کہ چہ بلوچستان ءَ انچیں ھال سر بیتگ کہ پاکستانی لشکر ءُ چیریں ادارہ آجوئی لوٹوکیں سیاسی گلانی باسک ءُ سروکاں اَنِگر کنگ ءُ تُرسینگ ءَ ھوار اَنت۔
بنشون: گزارش |اکس: مونوگرام
