بیروت: لبنان ءَ اکوام متھدہ ءِ کاروان ءِ سر ءَ سلاہ بندیں مردمانی اُرش ءَ امن مشن ءَ ھواریں آئرش ءِ لشکری کارمنْد مرتگ۔
جھانی رسانکدر ءِ رد ءَ آئرلینڈ ءِ پھازداریں لشکر ءَ وتی شنگ کرتگیں درشان ءَ گوشتگ کہ دو بکتر بند گاڑیانی سر ءَ ھشت لشکری کارمند بیروت ءِ نیمگ ءَ روگ ءَ بیتگ اَنت کہ راہ ءَ آیانی کاروان ءِ سر ءَ گوں کسانیں سلاھاں اُرش کنگ بیتگ۔
آئی ءَ وتی درشان ءَ دیمتر ءَ گوشتگ کہ لبنان ءَ اکوام متھدہ ءِ لشکر ( UNIFIL ) ءِ یکے ءُ دگہ یک کارمنْدے ءِ جاور ناگیگ اَنت۔
دو لشکری کارمند کمیں ٹپی بیتگ ءُ نادارھجاہ ءَ درمان کنگ بیگ ءَ اَنت۔ اکوام متھدہ ءِ پہ سلامتی کونسل ءِ دیوان ءَ ھوار بیگ ءَ نیویارک ءَ ساڑی ئیں آئرش ءِ دیمپانی وزیر ءَ گوشتگ کہ آ گوں اکوام متھدہ ءِ کارگشاد انتونیو گوتریس ءِ گوں ءَ ویل ءِ بارو ءَ گپ ءُ تران کنت۔
جھانی رسانکدر ءِ رد ءَ اکوام متھدہ ءِ کاروان ءِ سر ءَ اُرش کنگ ءِ سوب انگت زانگ بیگ ءَ نہ اِنت۔
بنشون: جھانی رسانکدر | اکس: دامگ
