بگداد: اراک ءَ سے تبکی ماڑی یے ءَ ٹوھیں تراکے بیتگ ءُ ماڑی سرجم ءَ تباہ بیتگ۔
یازدہ مردم جاھی مرتگ ءُ بازیں مردمے ٹپی اِنت۔
جھانی رسانکدر ءِ رد ءَ اے تراک اراک ءَ کردستان دمگ ءِ سیمی مزنیں شھر سلیمانیہ ءَ بیتگ۔
ماڑی سرجم تباہ بیتگ، چہ ماڑی ءِ لمبگ ءَ دو درزن ءَ گیش مردم زدگ بیتگ اَنت۔
جھانی رسانکدر ءِ رد ءَ تراک انچش ترند بیتگ کہ نزیکیں کوٹی ءُ گاڑیانی شیشگ پرشتگ اَنت۔
چہ ماڑی ءِ لُمبگ ءَ دنز چو جمبری کوکر ءَ چست بیتگ اَنت۔
کمکارانی گوشگ اِنت کہ مئے پازدہ ادارانی جھد کنگ ءَ پد مارا یازدہ جون دست کپتگ کہ آیانی تہ ءَ یک زھگے ھوار اِنت۔
سیزدہ مردم گوں ٹپ ءُ ٹوریں جاوراں کشگ بیتگ۔
دگہ چار مردم انگت ماڑی ءِ بار چیر ءَ اَنت ءُ گشگ نہ بیتگ اَنت کہ پہ آیاں مئے پَٹ ءُ پول برجاہ اِنت۔ تراک ءِ سوب چہ گیس سلنڈرے ءَ زانگ بیگ ءَ اِنت۔
بنشون: جھانی رسانکدر | اکس: دامگ
