بلوچ راجی زرمبشت ( بی این ایم ) ءِ بنجاھی سرکماش ڈاکٹر نسیم پاکستان ءِ وتگڑیں گچینکاری ءِ پژدر ءَ وتی کلوھی تامربندے ماں رسانکدر ءَ شنگ کرتگ۔
![](https://zrumbesh.com/wp-content/uploads/2024/02/1000226322-1024x576.jpg)
آئی ءَ گوشتگ کہ پاکستان ءَ ھشت پروری ءَ گچینکاری ءِ جارجتگ، اے جار ءِ رد ءَ پاکستان ءَ ھوار بلوچستان ءَ ھم گچینکاری بیت۔ بلوچستان یک کالونی ءُ زور گپتیں سرڈگارے۔ کالونی ءُ زورگپتیں ڈگارے ءَ گچینکاری دگہ ڈیھے کنت اود ءَ بلوچ ءُ بلوچستان وتواک نہ اِنت گڑا اے گچینکاری یک درکانودی ءُ بے دودیں کاریے بیت، پمیشکا کہ آ اد ءَ پہ زور نشتگ اد ءَ گچینکاری ھم پہ زور کنت۔
ڈاکٹرنسیم ءَ گوشتگ کہ آئی مول ءُ مراد ھمیش اِنت آ جھان ءَ را پیش دارگ لوٹ ایت اد ءَ بلوچ پہ وشی ءُ رزا نشتگ اَنت۔ اے منانک ھمیش اِنت کہ بلوچ چہ 1948بگر داں مرچی ءَ ھمک روچ گھگیری کنگ ءُ ھمے پیش دارگ ءَ اِنت بلوچ پہ وتی رزا ءَ اد ءَ نہ نشتگ اَنت، بلوچ پہ زور ایردست کنگ بوتگ ءُ اے زورگپتی ءَ پہ زور برجاہ دارگ ءَ اَنت۔
آئی ءَ گوشتگ کہ دومی گپ ایش انت ما ءُ شما ھما مردماں گچیں کن ایں اے مردم رو اَنت ءُ پہ پاکستان ءَ کانود سازی کن اَنت، آ پہ بلوچ ءَ کانود سازی نہ کن اَنت پمیشکا کہ آ بلوچ ءِ جگیر نہ اَنت، پاکستان ءِ جھگیر بنت۔ اے کانود سازی ءِ تہ ءَ پہ تئی زورگپتی ءِ مھکم کنگ ءَ توجیل سازگ بیت، اے کشت ءُ کوش بوگ ءَ اَنت، اے ھمک روچ مردم بیگواہ کنگ بوگ ءَ اَنت اے درساں کانودی رنگے ھمے مردم دے اَنت کہ اد ءَ گچینکاری ءَ سوبند بنت۔
ڈاکٹر نسیم گوشتگ کہ بلکیں اے ووٹ ووٹ نہ اَنت اے ووٹاں پاکستانی توانمند کاینت ءُ پہ ھرکس ءَ چارٹپہ جن اِنت ءُ یک مردمے گچین کن اَنت ، بلے پہ پیشدارگ ءَ لھتیں مردم گچینکاریانی جاہ ءَ اوشتارین اَنت، بلوچ راج باید اِنت کہ اے چیز ءَ سرپد بہ بیت ءُ ترس آماچ مہ بیت ءُ ایشانی بھر مہ بیت۔
آئی ءَ گوشتگ کہ ایشانی بھر بوگ ءِ مول یکے ھمیش اِنت تو وتی بلوچی ءَ ھلاس کنگ ءُ پاکستان ءِ بھر بوگ ءَ ئے، یکے ھمیش اِنت کہ ھمک روچ کشت ءُ کوش بوگ ءَ اِنت، ھمک روچ یک مردمے گرگ ءُ کشگ بیت گڑا بزاں شما اے درسیں چیزاں رزا دیگ ءَ اِنت کہ بیا پاکستان مارا بہ جن ءُ پکش مئے مردماں بیگواہ بہ کن۔
ڈاکٹر نسیم گوشتگ کہ ھما مردم ھزرانی کچ ءَ جنگ ءُ کشگ بوتگ اَنت یا ھما مردم چہ دہ دہ سالاں بیگواہ اَنت گڑا مئے ءُ شمےووٹ پاکستان ءَ را ھمے ھک ءَ دنت کہ مئے مردماں بیگواہ بہ کنت ءُ پُکش ایت، ھمے میارباری ءَ کہ پاکستان کنگ ءَ اِنت باید اِنت اے میارباری ءَ ما ءُ شما ھوار مہ بہ ایں ، ما وتی ووٹ ءَ پہ اے میارباری ءَ مہ دین ءُ اے میارباری ءَ مہ منّ ایں، اے میارباری ءَ پاکستان کنگ ءَ دس اِنت۔