کیچ/ جاؤ: مچ ءَ بلوچ آجوئی لشکر ( بی ایل اے ) مجید برگیڈ ءِ پدائی اُرش ءَ آپریشن درہ بولان ءَ شھید بوتگیں سرمچار شھید پدائی اتا اللہ پنام شیک گزک، شھید پدائی کاسم پنام تنگی لالا ءُ شھید پدائی جمال شاد پنام کمبر مھروان گلزمین ءِ میار کنگ بوتگ اَنت۔
پدائی شھیدانی لاش یک شمبے ءِ روچ ءَ کھولاں چہ بلوچستان ءِ بنجاھی شھر شال ءَ دزگپتگ اَنت۔ شھید اتا اللہ ءُ شھید کاسم ءِ لاش کیچ ءِ ھند ھیرونک ءَ برگ بوتگ اَنت۔ شھید جمال شاد ءِ لاش جاؤ کوھڑو ءَ برگ بوتگ۔
بنشون ءِ رد ءَ شھید کاسم ءُ شھید اتا اللہ ءِ لاش ءِ ھیرونک ءَ آرگ ءَ پیش جتا جتائیں ھند ءُ میتگانی مردم پہ شھیدانی لاشانی وش آتک ءَ آتکگ اَنت ءُ شھیدانی لاشانی سر ءَ پل شانگ بوتگ۔
شھیدانی لاشانی وش آتک ءَ آتکگیں مردمانی تہ ءَ زھگ ءُ جنین ھم بازیں کچے ءَ ھوار بوتگ اَنت، مردماں گوں اوگاماں شھید وش آتک کرتگ اَنت ءُ پہ شھیدانی شرپ ءَ راجی سوت ھم وانگ بوتگ۔
اھوالکار ءِ رد ءَ پہ شھید پدائی جمال شاد پنام کمبر مھروان ءِ لاش ءِ وش آتک ءَ چہ ھب چوکی ءَ ھم بازیں کچے ءَ مردم آتک اَنت۔
جاؤ واجہ باگ ءَ شھید ءِ لاش ءِ سر بوگ ءِ ھواری ءَ مردم بازیں کچے ءَ مچ بوتگ اَنت، لنجار، سستگان، وادی، ملان، گجرو، کوٹو، زیلگ، گزی، زیرکانی چبی، نرمگی، ڈولیجی، کُچ ڈولیجی، گلی، کُمبی، کوھڑو ءُ داروکوچگ ءِ مردماں بازیں کچے ءَ بھر زرتگ ءُ شھید ءِ لاش وش آتک کرتگ۔
لاش ءِ وش آتک ءَ آتکگیں مردمانی تہ ءَ جنین ءُ زھگ ھم بازیں کچے ءَ گوں بوتگ اَنت، مردماں لاش گوں اوگاماں وش آتک کرتگ۔
یات بہ بہ اِت کہ مچ ءَ بی ایل اے مجید برگیڈ ءِ اُرش ءَ آپریشن درہ بولان ءِ شھید پدائیانی لاش ھمک شھر ءَ سر بوگ ءَ اَنت مردم شھیدانی لاشاں گوں پل شانگ ءُ اوگاماں وش آتک کنگ ءَ اَنت۔
