بلوچ وومن پورم ءَ ماں رسانکدر ءَ وتی شنگ کرتگیں درشانے ءَ گوشتگ کہ بلوچ وومن پورم ھاران ھنکین ءِ آرگنائزنگ باڈی دیوان بُنجاھی آرگنائزر ڈاکٹر شلی ءِ سروکی ءَ برجم دارگ بوتگ، دیوان ءِ گچینی مھمان آرگنائزنگ کمیٹی ءِ بُنجاھی باسک شھناز بوتگ۔ دیوان ءِ بُنگپ بنجاھی سرکلر، گل ءِ کار ، ملکی ءُ درملکی سیاسی جاور ءُ گُڈی بُن گپ آؤکیں گامگیج بوتگ۔
گل ءِ کار ءِ بنگپ ءَ آیاں تران کنان ءَ گوشتگ کہ بلوچستان ءِ آدگہ ھند ءُ دمگ سیاسی ھوالہ ءَ پوہ ءُ سرپد اَنت ءُ جوانیں وڑے ءَ وتی کرد ءَ پیلو کنگ اَنت ھمے رنگ ءَ ھاران ءِ سرزمین راج دوستانی زمین اِنت کہ مزنیں کساسے ءَ مھلوک ھوار اَنت، بلے مروچی ئیں جاورانی رد ءَ زالبول ءِ سیاست ءِ تہ ءَ بھر زورگ الّمی اِنت، انچو کہ مردین آدم گراؤنڈ پولیٹکس ءَ جوانیں وڑے ءَ وتی کرد ءَ پیلو کنگ ءَ اَنت ھمے کچ ءَ بلوچ زالبولاں گوں سیاست ءَ ھمگرنچ بوگی اِنت پرچہ کہ آبادی ءِ نیم زالبول اِنت وھدیکہ زالبول بے توار بیت ، زالبول لوگ ءَ نندیت یا کہ زالبول شیوار نہ بیت گڈا بہ زان کہ تی آؤکیں پدریچ ءِ سر ءَ مزنیں سانے کپ ایت، لوگ ءِ تہ ءَ چُک ءِ سرپد کنگ یا کہ ھیل دیگ اے کارا شوکیں رنگے ءَ مات کُت کنت، انچو کہ نپولین گشیت کہ من ءَ وانندگیں ماتے بدئے من سوگند ورا کہ زانوگریں راجے ودی بیت۔ زالبول آ کارا گوں جوانیں رنگے کُت کنت آ کارا مردین کت نہ کنت گڑا مارا تیوک ءَ بلوچ زالبول وتی راجی زمہ واری پیلو کنگی اِنت مارا لس زالبول گوں وت ھمراہ کنگی اَنت آیانی تہ ءَ سیاسی سنچ بود ودی کنگی اِنت، بلوچ وومن پورم زالبولاں ھمک ھما ریاست ءِ زوراکی ءُ چاگردی سیلکاریانی بگیری ءَ توار چست کنگ ءِ سکین دنت۔ بلوچ زالبول ایوک ءَ گوں زھرشانیاں بندوک مہ بنت بلکیں سیاسی ءُ لیکھی جھدکار جوڑ بہ بنت ءُ وتی راجی زمہ واریاں دیم ءَ بہ بر اَنت۔ مروچی ھاران ھنکین ءِ جوڑ بوگ ءُ زالبولانی دیم ءَ آیگ ءُ زمہ واری زورگ ایش گپ ءِ مانزمان اِنت کہ ھاران ءِ تہءَ زالبول یک شوکیں سیاسی کردے پیلو کن اَنت۔
دیمتر ءَ آیاں تران کنان ءَ گوشتگ کہ اگاں ما بلوچ راجدپتر ءَ بہ چاریں ھر دور ءُ باریگ ءَ مارا زالبول گھگیری ءِ راہ ءَ گندگ ءَ کیت آ سیاسی پڑ بہ بیت یا کہ جنگی ۔ اگاں ما جھان ءِ گوستانکاں بہ وانیں گُڈا ھما زرمبشت سوبمند بوتگ اَنت کہ آ زرمبشتانی تہ ءَ زالبولاں مزنیں کچے ءَ بھر زرتگ ءُ وتی راجی زمہ واری پیلو کرتگ اَنت، ڈنی زرمبشتانی تہ ءَ زالبولانی ونگ ءُ گل جوڑ بوتگ اَنت ءُ پہ زالبولانی سیاسی ھیل دیگ ءِ شوربندی ٹھینگ بوتگ اَنت، ابید ءِ زالبولاں زرمبشت سوبمند بیت نہ کن اَنت ۔
آیاں گوشتگ کہ اگاں ما انیگیں روانک ءِ منانک ءَ بہ زوریں اد ءَ مزنیں کچے ءَ بلوچ زالبول ھوار بوتگ اَنت ءُ لیڈنگ پوزیشن ءَ بوتگ اَنت، اے کچ ءَ زالبولانی درآھگ پہ بلوچ راج ءَ وشیں پالے ۔ مروچی ھم بلوچ راج ءِ سیاست کجام ھم رنگ ءَ بیت آئی تہ ءَ زالبول ءِ کرد الم درشان بیت ءُ بلوچ وومن پورم ءِ باسک وتی کرد ءَ بزانت ءُ شوکیں رنگےءَ پیلو بہ کنت، داںکہ باندا روچ بلوچستان ءِ ھمک دمگ ءَ سیاسی سنچ ودی بہ بیت ءُ
ھمک بلوچ زالبول بلوچستان ءِ جاور ءُ بلوچ ءِ جاوراں پوه بہ بیت ءُ راه گیشینگ ءِ سنچ ءُ زانت ءَ بداریت۔
آؤکیں گامگیج ءِ تہءَ بلوچ وومن پورم ھاران ءِ آرگنائزنگ باڈی جوڑ کنگ بوتگ لاھبہ ثناء آرگنائزر ءُ سادیہ ڈپٹی آرگنائزر ،مروہ کندیل، امیمہ، زبیدہ آرگنائزنگ پتر باسک گچین کنگ بوتگ اَنت۔
