بلوچ راجی آجوئی سنگر (براس) ءِ جارکش بلوچ ھان ءَ ماں رسانکدر ءَ وتی شنگ کرتگیں درشانے ءَ گوشتگ کہ براس ءِ سرمچاراں بلوچستان ءِ جتائیں ھنداں شال، ھاران، کلات، آواران، کیچ ءُ پنجگور ءَ جتائیں کاروائیاں چاردہ اُرشاں زورگریں پاکستانی لشکر ءُ وتگڑیں گچینکاری جاہ، کارگس ءُ امیدوار نشانگ کرتگ اَنت۔
آئی ءَ گوشتگ کہ براس ءِ سرمچاراں مرچی سے پروری ءَ ھشت ءِ نزیک ءَ کلات ءِ ھند منگوچر ءَ جی یو آئی ءِ گچینکاری کارگس گوں دستی بمب ءَ نشانگ کرتگ۔
جارکش ءَ گوشتگ کہ ھمے وڑ ءَ سرمچاراں دگہ کاروائی یے ءَ کلات ءِ شھر ءَ زورگریں پاکستانی لشکر ءِ بنجل گوں راکٹ ءِ گولاھاں نشانگ کرتگ۔ اُرش ءِ آسر ءَ دُژمنیں لشکر ءَ سکا مالی ءُ جانی تاوان بوتگ۔
آئی ءَ گوشتگ کہ گوستگیں شپ ءَ دہ ءِ نزیک ءَ براس ءِ سرمچاراں کیچ ءِ ھند تجابان، کرکی ءَ زورگریں پاکستانی لشکر ءِ یک پانگسے ءِ سر ءَ گوں مزن ءُ وتکاریں سلاھاں اُرش کرتگ۔ اُرش ءِ آسر ءَ زورگریں لشکر ءِ کم چہ کم دو کارمند مرتگ ءُ باز ٹپی بوتگ، آئی ءَ مالی تاوان بوتگ۔
جارکش ءَ گوشتگ کہ براس ءِ سرمچاراں 2 پروری ءَ شال ءِ رودرآتکی بائی پاس ءَ مگسی اڈہ ءَ سھب ءِ دہ ءِ نزیک ءَ وتگڑیں پاکستان ءِ پہ گچینکاری ءَ برجاھیں کارگس گوں دستی بمب ءَ نشانگ کرتگ۔ یک دگہ کاروائی یے ءَ سرمچاراں دو پروری ءَ ھمے جاہ ءَ بیگاہ ءِ شش ءِ نزیک ءَ گچینکاری کارگس گوں دستی بمب ءَ نشانگ کرتگ۔
آئی ءَ گوشتگ کہ براس ءِ سرمچاراں گوستگیں شپ ءَ ھاران ءَ زورگریں پاکستان ءِ پیشیگیں وتگڑیں تھی کارانی وزیر ءُ گچینکاری ءَ پاکستان مسلم لیگ نوں ءِ امیدوار شئیب نوشیروانی ءِ گس گوں دستی بمب ءَ نشانگ کرتگ۔ اے گس پہ گچینکاری ءَ کارمرز بوگ ءَ بوتگ۔
جارکش ءَ گوشتگ کہ شئیب نوشیروانی، نواب اکبر ھان بگٹی ءِ شھیدی ءِ وھد ءَ بلوچستان ءِ تھی کارانی وزیر بوتگ۔ یکبرے پد ءَ زورگریں پاکستانی لشکر ءِ چیردستی ءَ اے مردم گچینکاری ءِ دروگ ءِ رد ءَ وزیر بوتگ ءُ زورگر ءِ نپاں پیلو کنگ ءَ اِنت۔
آئی گوشتگ کہ سرمچاراں گوستگیں شپ ءَ کلات شھر ءِ نزیک ءَ مگلزھی ءَ پیپلز پارٹی ءِ گچینکاری کارگس گوں دستی بمب ءَ نشانگ کرتگ۔
جارکش ءَ گوشتگ کہ براس ءِ سرمچاراں 31 جنوری ءَ کیچ ءِ ھند کرکی ءَ سی پیک دگ ءَ برجاھیں پاکستانی لشکر ءِ پانگس ءِ سر ءَ اُرش کرتگ سکا جانی ءُ مالی تاوان داتگ۔
آئی ءَ گوشتگ کہ براس ءِ سرمچاراں 30 جنوری ءَ کیچ ءِ ھند کولواہ بلور ءَ زورگریں پاکستانی لشکر ءِ یک پانگسے ءِ سر ءَ گوں وتکاریں سلاھاں ارش کرتگ۔ اُرش ءِ آسر ءَ دُژمن ءَ جانی تاوان بوتگ۔
جارکش ءَ گوشتگ کہ سرمچاراں 31 جنوری ءَ آواران ءِ ھند مشکے تنک ءَ دہ ءِ نزیک ءَ پاکستانی لشکر ءِ بنجل ءِ سر ءَ اُرش کرتگ ءُ دُژمنیں لشکر ءَ جانی ءُ مالی تاوان داتگ۔ سرمچاراں دگہ یک اُرشے ءَ 31 جنوری ءَ شپ ءِ ھشت ءَ مشکے اوگار ءَ دُژمنیں لشکر ءِ بنجل گوں مزنیں سلاھاں نشانگ کرتگ۔
آئی گوشتگ کہ براس ءِ سرمچاراں سی ءُ یک ءُ یک پروی ءِ شپ ءِ یک ءِ نزیک ءَ کیچ ءِ ھند ھوشاپ ءَ پاکستانی لشکر ءِ بنجل ءِ سر ءَ گوں راکٹ ءُ گرنیڈ لانچرانی گولا آس داتگ نشانگ کرتگ۔
جارکش ءَ گوشتگ کہ سرمچاراں 31 جنوری ءِ شپ ءَ پنجگور ءِ ھند کیلکور سھاکی ءَ آپ ءِ ٹینکی ءَ برجاھیں زورگریں پاکستانی لشکر ءِ پانگس گوں کسانیں سلاھاں نشانگ کرتگ۔
آئی گوشتگ کہ براس ءِ سرمچاراں 28جنوری ءَ آواران ءِ ھند کنیچی ءَ پاکستانی لشکر ءِ بنجل ءِ سر ءَ گوں وتکار ءُ مزنیں سلاھاں اُرش کرتگ، ایشی آسر ءَ دُژمنیں لشکر ءَ سکا جانی ءُ مالی تاوان بوتگ۔
جارکش بلوچ ھان ءَ گوشتگ کہ بلوچ راجی آجوئی سنگر ءَ پیسر ءَ ھم تچک کرتگ کہ زورگریں ڈیھ پاکستان ءِ نیمگ ءَ زورگپتیں بلوچستان ءَ وتگڑیں گچینکاری ءَ سرجم ءَ رد بہ کن اِت ءُ اے گچینکاری ءِ دروگ بلوچستان ءَ پاکستان ءِ زورگری ءِ دراجکش کنگ ءِ یک ھیلھے سرپد بہ ایں۔ آجوئی لوٹوکیں توانمند زورگر ءِ آدگہ پندل ءُ ھیلھانی وڑ ءَ اے وتگڑیں گچینکاری ءِ ھیلہ ءَ بلوچ راج ءِ کمک ءَ شریں وڑے ءَ دیم پہ دیمی کن اَنت ءُ آئی بے سوب کن اَنت۔
جارکش ءَ گوشتگ کہ براس ھمے گپ ءَ تچک کنت کہ گچینکاری کنوکانی سر ءَ بیوکیں اُرشاں سرمچار لّس مردماں چہ تاوانانی پھریزگ ءَ شریں وڑے ءَ ھیالداری کرتگ۔ ما گوں مردماں لوٹ کن ایں کہ آ چہ اے وتگڑیں گچینکاری جاھاں وت ءَ گستا بدار اَنت ءُ آیاں ھچ وڑیں تاوان مہ بیت۔
براس ءِ جارکش بلوچ ھان ءَ گوشتگ کہ زورگریں پاکستانی لشکر ءُ وتگڑیں گچینکاری جاھانی سر ءَ مئے اُرش برجاہ بنت۔
