کابل: یک اگست ءَ ماں کابل امریکا ءِ ڈرون ارش ءَ الکاھدہ ءِ سروک ایمن زواھری ءِ کوش ءَ پد تالبان سروک سراج ھکانی ءِ ھچ وڑیں ھال نیست کہ کجا انت. ھالانی رد ءَ سراج ھکانی امریکا ءِ دست ءَ ایمن زواھری ءِ کوش ءَ پد گوں لشکری کاروانے ءَ دیم پہ لوگر، پدءَ پکتیا ءُ گڈسر ءَ دیم پہ پکتیکا ءَ شتگ ءُ دنیگت آئی ءِ ھچ وڑیں ھال نیست کہ کجا انت ءُ پکتیکا ءِ آزمان ءَ مرچی سھب داں بیگاہ ءَ یک ڈرونے ھم ترّ ءُ گرد ءَ گندگ بیتگ، دنیگت زانگ بیگ ءَ نہ انت کہ اے کجام ملک ءِ ڈرون بوتگ.
سیاسی زانتکارانی رد ءَ امریکا ءِ دست ءَ ایمن زواھری ءِ کوش ءَ پاکستان ءُ تالبانانی ھکانی نٹورک کہ "گوں پاکستان ءَ نزیک انت” ءِ کمک ھوار بیتگ. سیاسی کارکنانی گوشگ انت کہ پاکستان ءَ ھمے زوتاں چہ امریکا ءَ لوٹ کرتگ کہ آئی ایم ایپ ءَ بہ پرما ایت کہ آئی ءَ وام بہ دنت ءُ ھمے کار ءِ بدل ءَ امریکا ءَ پہ ایمن زواھری ءِ کوش ءَ چہ پاکستان ءَ کمک لوٹ اتگ ءُ تالبانانی تہ ءَ ھکانی نٹورک گوں پاکستان ءَ نزیک انت، پمیشکا گمان کنگ بیگ ءَ انت کہ ایمن زواھری ءِ کوش ءَ سراج ھکانی ءِ دست ھوار انت ءُ آ پہ وتی رکینگ ءَ گوں لشکری کاروانے ءَ پکتیکا ءَ شتگ. تالبانانی جارکش زبی اللہ مجاھد ءَ چہ ایمن زواھری ءِ کوش ءَ پد اے درگت ءَ وتی اولی درشان ءِ تہ ءَ مرچی گوشتگ کہ تالبان ایمن زواھری ءِ ماں کابل ءَ جھمنندی ءَ سرپد نہ بیتگ انت ءُ مئے چیریں ادارہ اے درگت ءَ پٹ ءُ پول کنگ ءَ انت. بنشون: بنجاھی اھوالکار | اکس: دامگ
اوگانستان: الکاھدہ ءِ سروک ایمن زواھری ءِ کوش ءَ پد تالبان سروک سراج ھکانی ءِ ھچ وڑیں ھال نیست
اوگانستان: الکاھدہ ءِ سروک ایمن زواھری ءِ کوش ءَ پد تالبان سروک سراج ھکانی ءِ ھچ وڑیں ھال نیست
