لندن: پری بلوچستان موومنٹ ءَ بیست ءُ ھشت مئی ءَ بلوچستان ءَ پاکستانی زھرناکیں سلاھانی چکاسگ ءَ زورگپتیں بلوچستان ءَ ھمے سوب ءَ ودی بیتگیں ناگیگیں جاورھالانی بگیری ءَ جرمنی ءُ برتانیہ ءِ شھر لندن ءُ پوٹسڈیم ءَ زھرشانی کرتگ۔
برتانیہ ءَ زھرشانی لندن ءِ 10 ڈاوننگ سٹریٹ ءَ برتانیہ ءِ سروزیر ءِ گِس ءِ دیم ءَ بیتگ۔
کارکناں بازیں کچے ءَ بھر زرتگ ءُ مردماں ءَبلوچستان ءَ پاکستان ءِ زورگری، بلوچستان ءَ زھرناکیں سلاھانی چگاس جاہ ءِ وڑ ءَ کارمرز کنگ ءُ بلوچستان ءَ جانداھی، مال ءُ دلوت پہ آدگہ ساھدارانی تباھی ءِ باروا پنتاک بھر ءُ بانگ کنگ ءُ مردماں سرپدی دیگ بیتگ۔
جرمنی ءَ زھرشانی ءَ روانکے کشگ بیتگ۔
جرمنی ءَ زھرشانی ءِ بندات پوٹسڈیم ءِ بنجاھی ٹرین اسٹیشن ءِ دیم ءَ بیتگ۔ اود ءَ زھرشانی کنوکیں مردماں پاکستان ءُ ایران ءِ بلوچستان ءِ سر ءَ زورگری ءُ مردمی اگبالانی لپاشگ ءِ بگیری کنگ ءَ ھوار زھرناکیں سلاھانی چکاسگ ءَ ودی بیتگیں ناگیگیں جاورھالانی بگیری ءَ اوگام جتگ۔ آیاں ءَ بینر ءُ پلے کارڈ دست ءَ بیتگ ءُ آیانی سر ءَ بلوچستان ءِ سر ءَ پاکستان ءُ ایران ءِ درکانودی دستیگ کنگ ءُ زوراکی کنگ ءَ ھوار مردمی اگبالانی بگیری ءُ بلوچستان ءَ پاکستان ءِ زھرناکیں سلاھانی چکاسگ ءُ چہ آئی ءَ پد ودی بیتگیں ناگیگیں جاورھالانی باروا ءَ جتاھیں اوگام نبشتہ بیتگ۔
روانک ءِ بندات چہ پوٹسڈیم ءِ بنجاھی اسٹیشن ءِ دیم ءَ بیتگ، شھر ءِ جتا جتاھیں شھراں تَر ءُ گرد کرتگ ءُ لوئیزن پلاٹز ءَ شتگ۔
زھرشانی ءِ وھد ءَ پری بلوچستان موومنٹ ءِ کارکناں سدانی کَچ ءَ پنتاک بھر ءُ بانگ کرتگ کہ آیانی سر ءَ بیست ءُ ھشت مئی ءَ زھرناکیں سلاھانی چکاسگ ءِ باروا نبیسگ بیتگ اَنت۔
زھرشانی ءَ مھمد پارس، اَبدالجبار، آدل، ابوبکر، شکیل ستار ءُ نوید ءَ تران کرتگ ءُ بلوچستان ءِ ایران ءُ پاکستان ءِ دستیگ کنگ گوں ترندیں دانکاں ایر جتگ۔
آیاں تران کرتگ ءُ گوشتگ کہ بلوچستان ءِ دراجکشین گوستانک پاکستان ءُ ایران ءَ برتانیہ ءِ کمک ءَ کوھن کرتگ، بلوچ راج ءِ گوں ایردستی ءِ زمزیلاں بستگ ءُ چنچو دھک اِنت کہ بلوچستان ءَ زوراکی برجاہ اِنت۔
28 مئی 1998 ءِ روچ ءَ ھندوستان ءِ زھرناکیں سلاھانی پسّو ءَ پاکستان ءَ پہ وتی لشکر ءُ زھرناکیں سلاھانی پیشدارگ ءَ چہ وتی ناشریں کردار ءَ بلوچ سرڈگار گچین کرتگ ءُ زھرناکیں سلاھانی چکاس جاہ ءَ جوڑ کرتگ، چہ ایشی ءَ بلوچستان ءَ تباہ آماچیں جاور ودی بیتگ اَنت۔
آئی گوشتگ کہ ھمے چکاس ءَ جھان ءِ رھبند چم ءَ نیارتگ ءُ پاکستان ءَ بلوچ سرڈگار پہ دائمی کھت سالی ءِ آماچ کرتگ۔
اود ءَ نہ کشت ءُ کشار بیت، نہ درچک ءُ دار تیوگ ءَ تباہ بیتگ اَنت۔ ھمے مردم کشین سلاھاں بلوچستان ءِ واھُند تباھی ءِ آماچ کرتگ اَنت۔ شومک ءِ وڑیں زواراکیں نادراھی ءَ مردم ناگیگ کرتگ اَنت۔
چہ اے اُرش ءَ پد دانکہ انوں کسانیں زھگ کساں امُری ءَ بازیں کچے ءَ ھمے نادراھی ءِ آماچ بیتگ اَنت۔
بلے ھمے گپ ءِ گوشگ ءَ بژن بیت کہ میان استمانی ادارہ ءُ شرپمندیں راج اے زوراکی ءِ بگیری کنگ ءَ وتی زمہ واریانی پیلو کنگ ءَ شموشکار اَنت۔ ھمے سوب ءَ پاکستان ءُ ایران ءَ زوراکی کنگ ءِ نیمون رسگ ءَ اِنت۔ بنشون: درشان | اکس: پری بلوچستان موومنٹ
بیست ءُ ھشت مئی ءَ بلوچستان ءَ زھرناکیں سلاھانی چکاسگ ءِ بگیری ءَ پری بلوچستان موومنٹ ءَ برتانیہ ءُ جرمنی ءَ زھرشانی کرتگ۔
بیست ءُ ھشت مئی ءَ بلوچستان ءَ زھرناکیں سلاھانی چکاسگ ءِ بگیری ءَ پری بلوچستان موومنٹ ءَ برتانیہ ءُ جرمنی ءَ زھرشانی کرتگ۔
