کیپ: یوکرین ءِ بنجاھی شھر کیپ ءِ نزیکیں میتگ بوچا ءَ چہ مُچی مانشے ءَ 410 لاش دزکپتگ۔بوچا روسی لشکر ءِ دست ءَ بیتگ ءُ انوں یوکرینی لشکر ءَ زِتگ ءُ پد ءَ وتی دست ءَ کُرتگ۔
یوکرین ءِ دری کارانی وزیر ءَ گْوشتگ کہ روسی لشکر ءَ بوچا ءَ سدانی کچ ءَ مردم کُشتگ ءُ کُشگ بیتگیں شھریانی بابت ءَ پٹ ءُ پول برجاہ اِنت۔
چہ مُچی مانش ءَ دزکپتگیں لاشاں پد یوکرین ءَ جھانی آمیدگس ءَ پٹ ءُ پول کنگ ءِ لوٹ کُرتگ۔یوکرین ءِ مھتر ولادیمیرزیلنسکی وتی درشانی ءَ گْوشتگ کہ روس یوکرین ءَ چُکچینی کنگ ءَ اِنت۔
نیٹو ءِ کارگشاد ءَ بوچا شھریانی کوش دردناک گْوشتگ ءُ پرانس ءِ مھتر ءَ وئیل ایر جتگ ءُ گْوشتگ کہ روسی واکداراں اے میار ءِ پسو دیگی اِنت۔
بنشون: جھانی رسانکدر/ اکس: دامگ
