بلوچ آجوئی لشکر ( بی ایل اے ) ءِ جارکش آزاد ءَ ماں رسانکدر ءَ وتی شنگ کرتگیں درشانے ءَ گوشتگ کہ مئے سرمچاراں چارشمبے ءِ روچ ءَ شال ءِ شھر ءَ سریاب دگ ءَ برجاھیں پاکستان پیپلز پارٹی ءِ کارگس گوں دستی بمب ءَ نشانگ کرتگ۔
آئی ءَ گوشتگ کہ ارش ءِ میان ءَ پیپلزپارٹی ءِ امیدوار ءُ ریاست ءِ کمکار الی مدد جتک ھم ساڑی بوتگ۔ تراک ءِ آسر ءَ الی مدد ءِ سے سلاہ بندیں پھازدار جاوید جتک، نسراللہ جتک ءُ گلام اللہ ءَ ھوار پنچ مردم ٹپی بوتگ۔
جارکش ءَ گوشتگ کہ اے گپ ءَ تچک کن ایں اے کارگس ریاستی کمکار الی مدد جتک ءُ کشندہ ٹولی ءِ سروک جمال رئیسانی ءُ پرید رئیسانی ءِ نیمگ ءَ پہ پیپلز پارٹی ءَ وتگڑیں گچینکاری ءَ کارمز بوگ ءَ اِنت ءُ ھمے دومی نیمگ ءَ پہ کشندہ ٹولی ءَ بندر کارمرز بوگ ءَ اِنت۔
بی ایل اے جارکش آزاد ءَ گوشتگ کہ مئے اے وڑیں ارش داں زورگپتیں بلوچستان ءِ آجوئی ءَ برجاہ بنت۔
