بلوچ راجی آجوئی سنگر (براس) ءِ جارکش بلوچ ھان ءَ ماں رسانکدر ءَ وتی شنگ کرتگیں درشانے ءَ گوشتگ کہ آواران ءِ ھند مشکے ءَ زورگریں پاکستانی لشکر ءِ گون ءَ میڑاں بلوچ راجی آجوئی سنگر ءِ سرمچاراں ھپت کارمند کشتگ ءُ باز ٹپی کرتگ۔
آئی گوشتگ کہ مشکے ءِ ھند گُرانڈی زیرہ کور ءَ 30 دسمبر 2023 ءَ زورگریں پاکستانی لشکر ءَ یک ڈرون اُرشے ءَ پد جنگی بالگردانی سر ءَ کمانڈو ایر کرتگ براس ءِ بندر ءِ انگر کنگ ءِ جھد کرتگ۔ سرمچار چیرجنگی ءِ کارشونیانی پارست ءَ بھر بوتگ اَنت ءُ دُژمنیں لشکر ءِ دیم ءِ دارگ ءَ آیانی سر ءَ اُرش کرتگ ءُ دُژمن سکا تاوان داتگ۔
جارکش ءَ گوشتگ کہ دُژمن ءِ یک اُرشے ءَ بلوچ راجی آجوئی سنگر ءِ سے سرمچار سرور پنام درک، آزم پنام باسد ءُ اَبدالستار پنام مھراج شھید بوتگ اَنت۔ دو جاھاں سرمچارانی اُرشاں پاکستانی لشکر ءِ کم چہ کم ھپت کمانڈو مرتگ۔
آئی ءَ گوشتگ کہ اے میان ءَ دو سرمچار کینگی پنام مسلم ءُ الی پنام اتا زورگریں لشکر ءِ سر ءَ اُرش کرتگ ءُ دیم داشتگ وتی آدگہ ھمبل مھکمیں راھاں کش اتگ اَنت، دوئیں تمردیں ھمبلاں داں باز اداراں وتی گُڈی تیر ءَ گوں دُژمن ءَ جنگ کرتگ ءُ دیم داشتگ۔ دوئیں ھمبلاں داں تیرانی ھلاسی ءَ وتی دستاں شھیدی ءِ گرانبھائیں نام کٹ اِتگ۔
جارکش ءَ گوشتگ کہ شھید بوتگیں پنچیں تمردیں ھمبل براس ءِ جتائیں ھم سنتیں گلانی ھمبل اَنت۔ شھید سرور پنام درک ء مھم ھان جھمنند مشکے، گجر 2012 ءَ پہ راجی آجوئی ءِ گرگ ءَ بی ایل ایپ ءَ ھوار بوتگ۔ چہ وتی جھد ءُ جپاکشی ءَ آ کیپٹن ءِ اگدہ ءِ سر ءَ وتی پرزا پیلو کنگ ءَ بوتگ۔
آئی گوشتگ کہ شھید آزم پنام باسد ء گلام رسول جھمنند مشکے، آچڑین 2013 ءَ پہ بلوچ راجی آجوئی ءِ گرگ ءَ بی ایل ایپ ءَ ھوار بوتگ۔ آ بازیں جنگاں ھمبلانی گون ءَ ھوار بوتگ ءُ بھادری ءِ جوانیں کردے پیلو کرتگ۔
جارکش ءَ گوشتگ کہ چہ شھید بوتگیں ھمبلاں شھید اَبدالستار پنام مھراج ء اھمد مشکے ءِ ھند نوکجو ءِ جھمنند اِنت۔ آ پہ بلوچ سرڈگار ءِ آجوئی ءَ سلاہ بندیں گل گَھگیری ءَ 2016 ءَ بی ایل اے ءَ ھوار بوتگ۔ آ باز جوانیں گل ءِ جنگاں ھوار بوتگ۔
آئی گوشتگ کہ چہ شھید بوتگیں سرمچاراں الی پنام اتا ھیر بکش مشکے ءِ ھند گجلی ءِ جھمنند اِنت۔ آ 2013 ءَ بی ایل ایپ ءَ ھوار بوتگ ءُ بلوچ راجی آجوئی ءَ وتی پرز ءِ پیلو کنگ ءَ بوتگ۔ اے میان ءَ آ بازیں جاھاں شریں جنگاں ھوار بوتگ ءُ دُژمن ءِ تاوان داتگ۔
جارکش ءَ گوشتگ کہ شھید کینگی پنام مسلم ء شھید شیھک جان جھمنند مشکے میھی 2021 بی ایل ایپ ءَ ھوار بوتگ۔ آ آئی ای ڈی ایکسپرٹ ءَ زانگ بیت، آئی پت ءَ ھوار کھول ءِ سے مردم ءَ گیش راجی آجوئی جھد ءَ شھیدی ءِ گرانبھائیں نام اِش پہ وت گچین کُرتگ۔
جارکش بلوچ ھان ءَ گوشتگ کہ بلوچ راجی آجوئی سنگر اے تمردیں بلوچ سرمچاراں آیانی گرانبھائیں دیمونیاں ستک شانی ندر کنت ءُ ھمے کول ءَ کنت کہ شھید ھمبلانی کاروان ءَ داں گُڈی منزل ءَ سر کنت ءُ بلوچستان ءِ آجوئی ءِ لوٹ ءَ پیلو کنت۔
