کیپ: یوکرین ءُ روس ءِ جنگ ءَ روسی لشکر ءِ جنرل وتالی گریسموپ ھارکیپ ءِ نزیک ءَ یوکرینی لشکر ءِ گون ءَ دیم پہ دیمی میڑے ءَ کُشگ بیتگ ءُ اے میڑ ءَ روسی لشکر ءِ دگہ بازیں کارمندے مُرتگ ءُ ٹپی بیتگ۔
یوکرین ءِ سرکار ءِ رد ءَ روسی میجر جنرل چیچنیا ءُ شام ءَ روسی لشکر ءِ جنگ ءَ ھوار بیتگ۔
چہ روس ءِ نیمگ ءَ اے بابت ءَ ھچ گپ دیم ءَ نیاتکگ۔
دومی نیمگ ءَ یوکرین ءِ سر ءَ روسی لشکر ءِ بمبگواریں بالیگراب بمبگواری کنگ ءَ اَنت۔چہ ایشی ءَ مردم بازیں جنجالانی دیمپان اَنت ءُ چہ شھراں درکپت کنگ ءَ نہ اَنت۔یوکرین ءِ بازیں شھر ءَ لین نیست،مایپول شھر ءَ مردماں وردن ءُ آپ پہ ورگ ءَ نیست۔
چہ بازیں ڈیھانی روس ءِ سر ءَ پابندی جنگ ءِ دْوچ برجاہ اِنت۔
جھانی رسانکدر ءِ رد ءَ یوکرین ءِ سر ءَ اُرش کنگ ءَ پد روس جھان ءِ دُرساں گیش پابندیانی دیمپانی کنوکیں ڈیھ جوڑ بیتگ۔
جھانی پابندیانی یاداشت کنوکیں گل ءِ رد ءَ یوکرین ءِ سر ءَ اُرش کنگ ءَ پد روس ءِ سر ءَ 2ھزار778 پابندی جنگ بیتگ ءُ دُرسی ءَ پابندیانی کچ 5ھزار530 ءَ سر بیتگ اَنت۔ جھان ءِ تُرندیں پابندیانی دیمپانی کنوکیں ڈیھانی تہ ءَ دومی ایران ءُ سیمی گوریچانی کوریا اِنت۔
یوکرین ءِ سر ءَ اُرش کنگ ءَ پد روس ءِ سر ءَ امریکا ءَ ھوار آدگہ ڈیھاں باپاری پابندی جتگ ءُ امریکا روس ءِ تیل ءِ بھا زورگ ءِ سر ءَ پابندی جنگ ءِ بابت ءَ جیڑگ ءَ اِنت۔
بنشون: جھانی رسانکدر/اکس: دامگ
