بلوچستان لبریشن پرنٹ(بی ایل ایپ) ءِ جارکش میجر گھرام بلوچ ءَ وتی درشان ءَ گوشتگ کہ بی ایل ایپ ءِ سرمچاراں شش اپریل ءِ سھب ءِ ھپت ءَ ٹوھیں شوربندی یے ءِ رد ءَ زورگپتیں بلوچستان ءِ شال ءُ تپتان ءَ روکیں شھدگ چار جتائیں جاھاں بستگ۔ اے آپریشن بی ایل ایپ ءِ شوربندی ءِ بھرے اَت ایشی مول بلوچستان ءِ شھدگانی بند کنگ ءُ دژمن ءِ تر ءُ گرد ءِ دارگ ءُ بلوچستان ءِ چپ ءُ چاگرد ءِ دارگ اِنت۔ چہ ایشی ابید اے وڑیں کاروائیاں گل دژمن ءَ ھمے پیش دارگ لوٹ ایت کہ بلوچستان ءِ چونیں ھم ھندے سرمچارانی دست ءَ اِنت۔ پہ آپریشن ءِ سوبمندی ءَ سرمچار چار جتائیں ٹولیانی رنگ ءَ بھر کرتگ اَنت۔ آ وتی نشانگیں جاھانی گرگ ءَ پوجی پودناکی شریں وڑے ءَ پیش داشتگ ءُ دژمن تاوان داتگ۔
آئی گوشتگ کہ سرمچارانی اولی ٹولی ءَ کردگاپ ءَ پولیس تانہ ءِ سر ءَ اُرش کرتگ ءُ تانہ دستیگ کرتگ۔ تانہ ءِ درسیں کارمند دزگیر کرتگ ءُ آیانی سلاہ پل اِتگ اَنت۔ بی ایل ایپ ءَ وتی بلوچ راجی اکلاکی ءُ زرمبشت ءِ مول ءِ پژدر ءَ درسیں کارمند انسانی ھمدردی ءِ بنیاد ءَ کڈن کرتگ ءُ یل داتگ اَنت۔ اے ٹولی ءَ کردگاپ دوراھی ءَ دگ بستگ۔
جارکش ءَ گوشتگ کہ سرمچارانی دومی ٹولی ءَ کلی شاھنواز ءَ شھدگ بستگ۔ اود ءَ آیاں گوں دژمن ءِ ٹوھیں کاروانے ءَ ڈیک وارتگ کہ آ کاروان ءَ پازدہ ءَ گیش بکتربند گاڑی ھوار بوتگ۔ دژمن ءَ پہ دیم ءَ آیگ ءَ جھد کرتگ ءُ پہ دیم مارٹر آس داتگ۔ بلے سرمچاراں چہ مھکمیں سنگراں دژمن ءِ کاروان ءِ سر ءَ ترندیں اُرش کرتگ۔ چہ ایشی آسر ءَ دژمن ءِ کاروان پدکنز بوتگ ءُ چہ دور ءَ گولا آس داتگ ءُ شتگ۔
آئی گوشتگ کہ سرمچارانی سیمی ءُ چارمی ٹولیاں شال ءِ نزیک ءَ پنجپائی ءِ دو جاھاں سنگر گپتگ۔ اے ٹولیاں چہ شال ءِ نیمگ ءَ آیوکیں چونیں ھم پوجی کمک ءِ دارگ ءَ جوانیں کرد پیلو کرتگ۔ آیاں بازیں اداراں دژمن ءِ زمینی کمک داشتگ۔
آئی گوشتگ کہ دگ بندی ءِ وھد ءَ کردگاپ ءَ سادہ پوشاکیں پاکستانی پوج ءِ ایس ایس جی کمانڈو ءُ آدگہ کارمند سول گاڑیاں سوار بوتگ ءُ دگ بندی ءِ پروشگ ءِ جھد اِش کرتگ۔ سرمچاراں پہ وھد کاروائی کرتگ ءُ آ نشانگ کرتگ اَنت۔ یک گاڑی یے سرجم ءَ اُرش ءِ زد ءَ آتکگ۔ گاڑی ءَ سواریں پنچ کارمند ایس ایس جی کمانڈو بنیامین، نائیک پرزند الی، سپاھی بابر الی ءُ سپاھی ابوبکر جاھی مرتگ اَنت۔ آدگہ دوئیں گاڑی چہ جنگ جاہ ءَ تتکگ اَنت۔
جارکش ءَ گوشتگ کہ سھب ءِ دہ ءِ نزیک ءَ چہ نوشکی ءِ نیمگ ءَ آیوکیں بیست ءَ گیش گاڑیانی کاروانے ءَ کردگاپ دوراھی ءَ سرمچارانی انگیر ءِ پروشگ ءِ جھد کرتگ کہ اود ءَ یک ترندیں میڑے بندات بوتگ۔ سرمچاراں گوں راکٹ لانچر، گرنیڈ لانچر ءُ وتکاریں سلاھاں دژمن ءِ سَے گاڑی سرجم ءَ تباہ کرتگ۔ گاڑیاں سواریں باز کارمند مرتگ۔ چہ آیاں یکے ءِ نام مھمد مزمل اِنت۔ دژمن ءِ کاروان چہ ترس ءَ وتی ٹپی این ءُ لاش اُرش جاہ ءَ یل داتگ اَنت ءُ تتکگ۔
ھمے میان ءَ ڈرون، ھیلی کاپٹر ءُ کواڈ کاپٹرانی تر ءُ گرد برجاہ بوتگ۔ بلے سرمچارانی ترندیں گھگیری ءِ پژدر ءَ دژمن پدکنز اِتگ۔ ھمے وھد ءَ سرمچاراں دژمن ءِ بالیں سَے کواڈ کاپٹر ھم نشانگ کرتگ ءُ تباہ کرتگ اَنت۔ سرمچاراں وتی شوربندی ءِ رد ءَ نیمروچ ءَ دگ بندی ھلاس کرتگ۔ بلے دژمن ءِ ودار ءَ داں شپ ءَ شھدگ ءِ نزیکیں جتائیں ھنداں سنگر داشتگ اَنت۔
جارکش ءَ گوشتگ کہ اے کاروائی ءِ وھد ءَ بی ایل ایپ ءِ یک دلیریں سرمچارے اکلاک اھمد مینگل پنام نزیر ھزدار ءِ ھند وڈ ءِ جھمنند اِنت گوں دژمن ءَ دیم پی دیمی میڑ ءَ دلیری ءَ جنگ داتگ ءُ شھید بوتگ۔ شھید اکلاک اھمد نہ تھنا یک شریں چیرجنگی کمانڈرے بوتگ بلکیں یک آشوبی شائرے ھم بوتگ۔ آئی وڈ، بولان، مستونگ ءُ کلات ءِ سنگراں زرمبشت مھکم کرتگ ءُ کلات ءِ ھند مھلبی ءَ بنجل ءِ کمانڈرے ءِ بستار ءَ وتی کرد پیلو کرتگ۔ شھیدی ءِ وھد ءَ آ کردگاپ ءُ گرگینہ ءَ یک تر ءُ گردی ٹولی یے ءِ سروکی ءَ کنگ ءَ بوتگ۔ بی ایل ایپ اے گرانکدریں راجی پسگ ءِ دیمونی ءَ ستک شانی ندر کنت۔
جارکش ءَ گوشتگ کہ بلوچستان لبریشن پرنٹ اے گپ ءَ تچک ءَ گوش ایت کہ کردگاپ آپریشن پہ زورگپتیں بلوچستان ءِ آجوئی ءَ برجاھیں دراجیں جنگ ءَ مئے راجی ارادہ ءُ جھد ءِ بھر اِنت۔ بی ایل ایپ ءَ ھمک جاہ ءَ دژمن ءَ را پیش داشتگ کہ گل کجام جاہ ءُ وھد ءَ بہ لوٹ ایت زورگریں ریاست ءَ پروش دات کنت ءُ سرجمیں نزام ءَ تاوان دنت۔ اے کاروائی داں ھما وھد ءَ برجاہ بنت دانکہ زورگریں پوج ءِ گڈی سپاھی چہ مئے سرزمین ءَ در نہ کپ ایت۔ مئے جنگ آجو ءُ وتواجھیں بلوچستان ءِ جوڑ بوگ ءَ ھمک سنگر ءَ گوں ترندی ءَ برجاہ بیت۔
بنشون: درشان اکس: زرمبش
