بلوچ نیشنل موومنٹ ءِ انسانی ھکانی ادارہ پانک ءَ بلوچستان ءَ برجاھیں زوریں بیگواھی ءُ درکانودی کوشانی سر ءَ بژن درشان کرتگ ءُ شیھک رھیم ءُ سبزل بلوچ ءِ کوش ایر جتگ۔
آئی ءَ گوشتگ کہ شیھک رھیم ء رھیم بکش کیچ ءِ ھند بلیدہ میناز ءِ جاہ منند اِنت ءُ نودربرے۔ 31 مارچ 2026 ءَ چہ تربت ءِ مزنیں شھر ءَ ریاستی چیردستی ءَ کارکنوکیں سلاہ بندیں ٹولی ءَ آوار جتگ۔ داں باز روچ ءِ بیگواھی ءَ پد 5 اپریل 2026 ءَ آئی تیرسپتگیں لاش چہ پسنی دگ ءَ بانک چڑائی ءَ دزکپتگ۔
آئی ءَ گوشتگ کہ ھژدہ سالیگیں ورنا سبزل بلوچ ھیر آباد ءِ جاہ منند اِنت ءُ یک گریبیں کھولے ءِ مردم اِنت۔25 جولائی 2025 ءَ چہ گْوادر ءُ تُربَت ءِ میانی ھند تلار چوکی ءَ ایپ سی ءَ آوار جتگ ءُ بیگواہ کرتگ۔ ھشت ماہ ءِ زوریں بیگواھی ءَ پد یک اپریل 2026 ءَ آئی لاش چہ گْوادر ءِ ھند پلیری ءَ دزکپتگ۔
پانک ءَ اے دوئیں ویل بلوچستان ءَ برجاھیں انسانی ھکانی گنتریں بگیری لیک اتگ ءُ گوشتگ کہ ورنا زور بیگواہ کنگ ءُ پد ءَ کشگ ءُ آیانی لاش چگل دیگ بوگ ءَ اَنت۔ اے گامگیج میان استمانی انسانی ھکانی کانود ءِ تچک ءَ بگیری اِنت۔
آئی ءَ لوٹ کرتگ کہ اے ویلانی بابت ءَ زوت پٹ ءُ پول کنگ بہ بیت، زمہ وار کانود ءِ رد ءَ جست گرگ بہ بنت ءُ سانمندیں کھول انساپ دیگ بہ بنت۔
بنشون: درشان اکس: پانک
