بلوچ یکجھتی کمیٹی ءَ وتی درشانے ءَ گوشتگ کہ گلام کادر ء مراد بکش ھژدہ سالی نودربرے ءُ گْوادر ءِ جاہ منند اِنت۔ 24 نومبر 2025 ءَ چہ گْوادر ءِ کوسٹ نادراھجاہ ءَ آوار جنگ ءُ درکانودی بندیگ کنگ بوتگ۔
درشان ءَ گوشگ بوتگ کہ چار ماہ ءُ ھپت روچ ءَ پد یک اپریل 2026 ءَ گلام کادر ءِ لاش چہ گْوادر ءِ ھند پلیری ءَ دزکپتگ کہ آ ناھک ءَ کشگ بوتگ۔
بی وائی سی ءَ اے ویل ایر جتگ ءُ گوشتگ کہ بلوچستان ءَ زوریں بیگواھی ءُ درکانودی کوش ءِ ویلانی درچ روچ پہ روچ ءَ گیش بوگ ءَ اِنت ءُ ھمک روچ ءَ بے ترس ءَ لاش چگل دیگ بوگ ءَ اَنت۔
آئی ءَ گوں میان استمانی انسانی گل ءُ میان استمانی تک ءَ لوٹ کرتگ کہ آ اے جیڑہ ءِ سر ءَ زوت دلگوش گور بہ کن اَنت ءُ پہ انساپ ءَ وتی کرد ءَ پیلو بہ کن اَنت۔
درشان ءِ گڈی ءَ گوشگ بوتگ کہ ما اے زوراکیاں بے ھال نہ کن این ءُ بے توار نہ بہ ایں، پہ ھکاں توار چست کن ایں۔
بنشون: درشان اکس: بی وائی سی
