شال ءَ پولیس ءِ بندیگجاہ ءَ ورنایے ءَ وتکشی کرتگ، کھول ءَ پولیس ءِ سر ءَ بھتام جتگ ءُ ویل ءِ بابت ءَ پٹ ءُ پول کنگ ءِ لوٹ کرتگ۔
بیران بوتگیں ورنا ءِ نام اسرار اھمد ء مھمد انور اِنت کہ شش روچ پیش پولیس ءَ آوار جتگ ءُ بیگواہ کرتگ۔
مھمد انور ءِ گوشگ اِنت کہ منی زھگ شش روچ پیش ایگل اسکواڈ ءِ کارمنداں دزگیر کرتگ۔ من یکشل ءَ جتائیں تھانھاں شتگ ءُ وتی زھگ ءِ بابت ءَ جست کرتگ۔ من ءَ ھمک جاہ ءَ ھمے گوشگ بوتگ کہ اسرار اھمد ما دزگیر نہ کرتگ۔
مھمد انور ءِ رد ءَ مرچی من ءَ سریاب ءِ ایس پی ءَ رھوت کرتگ ءُ گوشتگ کہ تئی زھگ ءَ چہ شلوار ءِ ھانجگ ءَ وت ءَ لوپ کرتگ ءُ وتکشی کرتگ۔
آئی ءِ گوشگ اِنت کہ منی زھگ پولیس کارمنداں پاھو داتگ ءُ کشتگ، نوں آئی ءَ وتکشی کنگ ءِ نام ءَ دیگ ءَ اَنت۔
کھول ءَ گوں سرکار ءَ لوٹ کرتگ کہ اے ویل ءِ بابت ءَ پٹ ءُ پول کنگ بہ بیت ءُ زمہ وارانی بگیری ءَ کاروائی کنگ بہ بیت۔
بنشون: کھول اکس: رسانکدر
