چہ ھزدار ءَ پاکستانی پوج ءِ دست ءَ زوربیگواھیں ابدلگنی بلوچ ءِ کھول ءَ وتی درشانے ءَ گوشتگ کہ گنی بلوچ ءِ زوریں بیگواھی ءَ سیئسد روچ ءَگیش اِنت کہ انگت آئی ھچ ھال نیست چون ءُ کج ءَ اِنت۔
آئی کھول ءِ گوشگ اِنت کہ گنی بلوچ ایم پل ءِ نودربرے ءُ پاکستانی پوج ءَ 25 مئی 2025 ءَ ھما وھد ءَ آوارجتگ ءُ بیگواہ کرتگ کہ آ گوں المنیر بس ءَ چہ شال ءَ کراچی ءَ روگ ءَ بوتگ کہ ھزدار ءِ ھند کادری ھوٹل ءِ نزیک ءَ پاکستانی پوج ءِ کارمنداں گنی بلوچ ءِ پجار کارڈ ءِ چارگ ءَ پد چہ بس ءَ ایر کرتگ ءُ بیگواہ کرتگ۔ چہ ایشی ءَ پد ھما اِنت کہ مارا گنی بلوچ ءِ بابت ھچ سرپدی دیگ نہ بوتگ۔ چہ ایشی ءَ مئے سرجمیں کھول سکا جنجالانی دیمپان اِنت۔
آئی کھول ءِ گوشگ اِنت کہ ما پہ گنی بلوچ ءِ آجوئی ءَ آمیدگس ءُ کمیشن ءَ شتگ ایں بلے نہ آ آمیدگس ءَ پیش کنگ بوتگ ءُ نہ پہ آئی آجوئی ءَ گامگیج زورگ بوتگ۔
آئی کھول ءَ گوں سرکار ءَ لوٹ کرتگ کہ اگاں گنی بلوچ ءِ سر ءَ چونیں ھم بھتامے ھست گڑا آ زوت آمیدگس ءَ پیش کنگ بہ بیت دانکہ آئی ءَ کانودی ھک دیگ بہ بیت۔ اگاں آ بے میار اِنت گڑا آ زوت آجو کنگ بہ بیت۔
کھول ءَ گوشتگ کہ ما گوں انسانی ھکانی گلاں لوٹ کن ایں کہ آ اے جیڑہ ءِ گیش ءُ گیوار کنگ ءَ گامگیج بہ زور اَنت ءُ پہ گنی بلوچ ءِ آجوئی ءَ توار چست بہ کن اَنت۔
بنشون: درشان اکس: رسانکدر
