بلوچستان لبریشن پرنٹ ءِ جارکش میجر گھرام بلوچ ءَ بی ایل ایپ ءِ مارچ ءِ کاروائیانی رپورٹ شنگ کرتگ ءُ گوشتگ کہ سرمچاراں مارچ ءِ ماہ ءَ زورگریں پاکستانی پوج ءُ آئی جھلی ادارہ ءُ مالی شوربندیانی سر ءَ اُرشانی تہ ءَ گیشی آرتگ ءُ 39 کاروائی کرتگ۔ اے میان ءَ دژمن ءَ بازیں کچے ءَ جانی ءُ مالی تاوان داتگ۔ اے کاروائی پنجگور، پسنی، کوھلو، تربت، ھوشاب، ھزدار، بیسیمگ، ھب، جاؤ، ھیرونک، تمپ، نال، گوادر، تجابان، چاگی، واشک، مند، مستونگ، بارکھان، کلات، شاھرک، مالار ءُ گیشکور ءَ ھوار دگہ 23 ھنداں کنگ بوتگ اَنت۔ ایشی آسر ءَ کم چہ کم 30 کارمند مرتگ ءُ ھپت سکا ٹپی بوتگ۔
آئی گوشتگ کہ بی ایل ایپ ءِ سرمچاراں مارچ ءِ ماہ ءَ درساں مزنیں کاروائی تمپ ءِ ھند اپسی کھن ءَ کرتگ۔ اود ءَ سرمچاراں شوربندی ءِ رد ءَ دژمن ءِ چوکیانی سر ءَ ترندیں اُرش کرتگ ءُ ڈرون تباہ کرتگ۔ اے آپریشن ءِ وھد ءَ زورگریں پوج ءِ پازدہ کارمند کشتگ، اے آپریشن ھمے راستی ءَ پیش دار ایت کہ سرمچارانی سوبمندی پوجی ھنر ءِ سوب ءَ دژمن ترس آماچ اِنت۔
آئی گوشتگ کہ چیریں بھرگ ءَ سَے آپریشن ءِ وھد ءَ دژمن ءِ دوازدہ نزیکیں کارمند ءُ چریک کشتگ۔ اے نیٹورک بلوچ ورنایانی زوریں بیگواھی ءُ سرمچارانی چاریگی ءَ تچک ءَ ھوار اَنت۔ ھمے وڑ ءَ سرمچاراں دژمن ءِ چاریگی نشانگ کرتگ ءُ سَے ڈرون ءُ دو کیمرہ تباہ کرتگ۔ یک دگہ کاروائی یے ءَ دژمن ءِ انٹیلیجنس کارگس نشانگ کرتگ ءُ تاوان داتگ۔
جارکش ءَ گوشتگ کہ پوج ءِ پازدہ چوکی ءُ پنچ مزنیں بنجلانی سر ءَ اُرش کرتگ۔ دژمن ءِ راشنانی تاوان دیگ ءَ پنچ جاہ ءَ دگ بندی کرتگ۔ زورگپتیں بلوچستان ءِ مڈیانی لٹ ءُ پل ءَ ھواریں یک کمپنی یے نشانگ کرتگ۔ اُرشانی وھد ءَ دژمن ءِ شش گاڑی تباہ کرتگ ءُ مادن بروکیں دو گاڑی نشانگ کرتگ۔
آئی گوشتگ کہ اے ماہ ءِ کاروائیاں نوکین ءُ ٹوھیں سلاہ کارمرز کنگ بوتگ۔ کم چہ کم یازدہ اُرش ٹوھیں سلاھانی سر ءَ کنگ بوتگ اَنت۔ پنچ گرنیڈ لانچر ءِ اُرش، دو دستی بمب ءُ دو چیر کرتگیں شورھانی تراک کرتگ۔ دو سنائپر اُرشاں دژمن نشانگ کرتگ، گوں دژمن ءَ دو جاہ ءَ دیم پہ دیمی میڑ بوتگ ءُ پوج ءِ یک کاروانے ھم اُرش ءَ نشانگ کرتگ۔ اے کاروائیانی وھد ءَ سرمچاراں دژمن ءِ سلاہ ھم دستیگ کرتگ اَنت۔
جارکش ءَگوشتگ کہ پہ وتن ءِ رکینگ ءَ اے جنگ ءَ بی ایل ایپ ءِ نھ سرمچاراں گوں دلیری ءَ جنگ داتگ ءُ شھید بوتگ اَنت۔ اے شھیداں دژمن ءَ را پیش داشتگ کہ پوجی زور ءَ بلوچ راج ءِ آجوئی جزبگ نزور کنگ نہ بیت۔ بی ایل ایپ اے راجی شھیداں آیانی بے مٹیں دیمونیانی سر ءَ ستک شانی ندر کنت ءُ آیانی جھد ءَ منزل ءَ سر کنگ ءِ کول ءَ کنت۔
بنشون: رپورٹ اکس: زرمبش
