شال: وائس پار بلوچ مسنگ پرسنز (وی بی ایم پی) ءِ زھرشانی گدان ءَ 6120 روچ سرجم بوتگ کہ ایگزیکٹو کمیٹی ءِ کارکن نیاز مھمد ءِ سروکی ءَ شال پریس کلب ءِ دیم ءَ برجاہ بوتگ۔
اے درگت ءَ کامریڈ منزور بلوچ ءُ ھدائے رھیم ءَ ھوار جتائیں بھرگاں سیادی داروکیں مردم زھرشانی گدان ءَ آتکگ اَنت ءُ گوں زوربیگواھیں مردمانی کھولاں ھمدردی درشان کرتگ۔ آیاں زوربیگواھی ءِ ھلاسی ءُ درسیں مردمانی آجوئی ءِ لوٹ کرتگ۔
وی بی ایم پی ءِ ایگزیکٹو کمیٹی ءِ کارکن نیاز مھمد ءَ گوشتگ کہ گوستگیں شانزدہ سال اِنت کہ پہ بیگواھیں مردمانی آجوئی ءُ زوربیگواھی ءُ درکانودی گامگیجانی بگیری ءَ جھد کنگ ءَ ایں۔ گوں بژن ءَ گوشگ بیت کہ اے انسانی ھکانی گنتریں جیڑہ زوریں بیگواھی ءِ درچ ھمک روچ گیش بوگ ءَ اِنت کہ شھریانی بنکی انسانی ھکانی گنتریں لگتمالی اِنت۔
آئی گوں سرکار ءُ ادارھانی سروکاں لوٹ کرتگ کہ بیگواھیں مردمانی آجوئی ءَ دلجمی دیگ بہ بیت ءُ زوربیگواھیانی ھلاس کنگ ءَ کانود سازی ءُ شریں گامگیج زورگ بہ بیت۔ دانکہ پاکستان ءُ گیشتر بلوچستان ءَ انسانی گنتریں جیڑہ ھلاس کنگ بہ بیت۔
بنشون: درشان. اکس: وی بی ایم پی
