جنیوا : بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَ گوں بی بی اردو ءِ پیشیگیں اھوالکار سکلین امام ءَ گلگدار ءَ گوشتگ کہ وھدے بلوچستان ءُ بلوچ ، پاکستان ءُ آئی آئین ءِ گپ بہ بیت، انچوش کہ تئی گوشگ اِنت جتائیں زرمبشت ھست، گٗڑا ھر یکے ھما وڑ ءَ چارگ ءُ پسہ دئیگ بیت۔ یکے آجوئی ءِ زرمبشت اِنت ءُ دومی پہ ھکاں جھد کنگ اِنت، یکے ھما اِنت کہ آ پارلیمنٹ ءِ سیاست ءِ رد ءَ بزاں نزام ءِ تہ ءَ بلوچ راج ءِ باندات، زبان، دودمان ءُ مڈیانی پھریزگ ءِ گپ ءَ کن اَنت۔ بلے ما گندگ ءَ ایں کہ ھما مردم پاکستان ءِ پارلیمنٹ ءُ گچینکاری نزام ءِ بھر بوتگ اَنت آ ھم کم کم ءَ بے اوست بوگ ءَ اَنت۔ اکتر مینگل ءِ چہ اسمبلی ءَ دزکشی ھم بے اوستی ءَ پیش دار ایت۔ ڈاکٹر مالک بلوچ وت ءَ راجدوستے گوش ایت ءُ پارلیمنٹ ءِ سیاست ءَ کنت، آ ھم یکشل ءَ چہ نزام ءَ بے اوستی پیش کنگ ءَ اِنت۔ اے درسانی کوشست ھمے بوتگ کہ پارلیمنٹ ءِ تہ ءَ جیڑھاں گیش ءُ گیوار بہ کن ایں۔ نواب ھیربکش مری، سردار اتا اللہ مینگل ءُ نواب ھیربکش مری ءِ زھگ شھید بالاچ مری ھم پارلیمنٹ ءَ ھوار بوتگ اَنت، اے درس بے اوست بوتگ اَنت۔ نواب ھیربکش مری ءُ آئی شھیدیں زھگ بالاچ مری کجام راہ گچین کرتگ آئی آسر شمئے دیم ءَ اِنت۔ آ ھمے سرپد بوتگ اَنت کہ پاکستان ءِ پارلیمنٹ ءِ تہ ءَ پجار، زبان ءُ دودمان رک ات نہ کن اَنت۔
ڈاکٹر نسیم بلوچ ءَ امریکہ ءُ اوگانستان ءِ جنگ ءِ درور داتگ ءُ گوشتگ کہ مرچی چہ درساں مستریں توانمند امریکہ اِنت، آئی اوگانستان ءِ تہ ءَ وتی زور چکاس اتگ بلے آئی اوگان راج پروش دات نہ کرتگ۔ روس ءَ ھم اوگانستان ءَ اوگان راج پروش دات نہ کرتگ۔ امریکہ ءَ ویتنام ءَ ویتنامی پروش دات نہ کرتگ اَنت۔ گوستانک شاھد اِنت کہ ھچ راجی زرمبشتے پہ زور ھلاس کنگ نہ بیت۔
بلوچ نیشنل موومنٹ ءِ چیئرمین ءَ گوشتگ کہ بلوچ یک راجے ءِ بستار ءَ مڑگ ءَ اِنت، اے جھد یک پردے یا سنگل پارٹی یے ءِ نہ اِنت۔
میان استمانی تاکتانی آھگ ءِ سر ءَ جستے ءِ پسہ ءَ ڈاکٹر نسیم بلوچ ءَ گوشتگ کہ ما کجام ھم پوج ءِ آھگ ءِ کمک ءَ نہ لوٹ ایں۔ ما وتی زرمبشت ءَ چہ بلوچ راج ءَ ابید دگہ کسی کمک ءَ دیم ءَ برگ نہ لوٹ ایں۔ مئے ھندی ءُ تھی زرمبشتے ءُ داں مرچی پہ بلوچ ءَ کس ءَ توپک چست نہ کرتگ ءُ ما ھم نہ لوٹ ایں، ما وت مڑ ایں۔ اگاں جھان ءِ گپ کنگ بہ بیت آ وت ءَ شرپمندیں جھانے گوش اَنت ءُ انسانی ھکانی گپ ءَ جن اَنت۔ انچوش کہ یورپ ءُ امریکہ اَنت ما دلجم ایں یک روچے الم سرپد بنت ءُ مار اَنت کہ ھما انسانی ھکانی گپ ءَ کن اَنت آ انسانی ھک لگتمال بوگ ءَ اَنت۔ اگاں پاکستان ءِ گپ بیت گڑا اود ءَ جی ایس پی پلس ءِ سر ءَ سک باز گپ ءُ تران بوگ ءَ اِنت۔
آئی ءَ امریکہ، یورپ ءُ اکوام متھدہ ءِ کمک نہ کنگ ءِ جست ءِ پسو ءَ گوشتگ کہ اے گپ راستے انگت ءَ دگہ کرار داد منگ نہ بوتگ، ما ھمے سرپد بہ ایں کہ میان استمانی تک ءَ گوں ھورتی ءَ چارگ لوٹ ایت۔ آ تھنا یکے ءِ گپاں گوش مدار اَنت، اود ءَ دو جتائیں لیکہ اَنت، یکے پاکستان ریاست اِنت ءُ یکے بلوچ راج ئیگ اِنت۔ اگاں بلوچ وتی جھد ءَ برجاہ دار ایت گڑا یک روچے الم میان استمان مئے لیکہ ءَ گوش دار ایت ءُ آئی ءَ ارزشت دنت۔
ڈاکٹر نسیم بلوچ ءَ گوں پاکستان ءَ گپ ءُ تران ءَ لوٹانی منگ ءِ جست ءِ پسو ءَ گوشتگ کہ پاکستان سرکار گوں کئے گپ کنگ لوٹ ایت؟ انوگیں زرمبشت ءَ ڈاکٹر ماہ رنگ ءُ آئی سنگت دیم ءَ برگ ءَ اَنت، آ بندیگ انت، گوں آیاں گپ ءُ تران کئے کنگ ءَ اِنت؟ ریاست گپ کنگ نہ لوٹ ایت۔
بی این ایم ءِ چیئرمین ءَ گڈی ءَ گوشتگ کہ ما زان ایں جھان انچو بے زرد نہ اِنت ءُ آ داں دیر ءَ بے توار نہ بیت۔یک روچے آئی ءَ دیم ءَ آھگ ءُ اے جیڑہ ءِ سر ءَ گپ جنگ لوٹ ایت۔
بنشون: گلگدار اکس: اسکرین شارٹ