شال ءَ پہ زور بیگواھیں مردمانی آجوئیءَ وائس پار بلوچ مسنگ پرسنز ءِ( وی بی ایم پی ) ءِ زھرشانی گدانءَ 6118 روچ سرجم بوتگ۔ یک شمبے ءِ روچ ءَ گلءِ ایگزیکٹو کمیٹی ءِ باسک نیاز مھمد گدانءَ ساڑی بوتگ۔
کامریڈ مزور بلوچ ءَ ھوار جتائیں بھرگاں سیادی داروکیں مردم پہ بیگواھیں مردمانی کھولانی ھمدردی درشان کنگ ءَ گدانءَ اتکگ اَنت۔
گل ءِگوشگ اَنت کہ مرچی زور بیگواھیں نودربر ممتاز بلوچ ءِ گھار ساجدہ بلوچ ھم گدانءَ اتکگ ءُ آئی زوریں بیگواھی ءِ کیس گلءِ کر ءَ یاداشتگ کرتگ ءُ گوشتگ کہ ممتاز بلوچ ء دلبود بلوچستان یونیورسٹی ءِ بلوچ بھر ءِ پنچمی سمسٹر ءِ نودربرے۔ 18 مارچ ءَ تربت ءَ چہ کولوائی بازار ءَ پاکستانی پوج ءَ آوار جتگ ءُ بیگواہ کرتگ۔
ساجدہ بلوچ ءِ گوشگ اِنت کہ نہ مارا ممتاز بلوچ ءِ آوار جنی ءِ سوب ءَ گوشگ ءَ اَنت ءُ نہ آیانی سلامتی ءِ ھال ءَ دیگ ءَ اَنت۔ چہ ایشی ءَ مئے کھول سکا جنجالانی دیمپان اِنت۔
وی بی ایم پی ءِ چیئرمین نسر اللہ بلوچ ءَ گوں سرکار ءَ لوٹ کرتگ کہ ممتاز بلوچ زوت آجو کنگ بہ بیت، اگاں آئی سر ءَ چونیں بھتامے ھست گڑا دیم ءَ آرگ ءُ آمیدگس ءَ پیش کنگ بہ بیت۔ کھول چہ سسائی جنجالاں کشگ بہ بیت۔
بنشون: درشان اکس: وی بی ایم پی
