بلوچ راجدوستیں سروک ءُ بلوچ نیشنل موومنٹ ءِ پیشیگیں چیئرمین ھلیل بلوچ ءَ وتی درشانے ءَ گوشتگ کہ مرچیگیں روچ اچما ھمے دلگوش ءِ لوٹ ءَ کنت کہ ھپتاد ءُ ھشت سالانی زورگپتی ءِ بگیری ءَ برجاھیں جھد تیز کنگ ءُ پہ راجی مول ءَ سر بوگ ءَ دژمن ءِ بگیری ءَ درسیں پڑاں اتھاد ءُ راجی یکمشتی درکار اِنت۔
آئی ءَ گوشتگ کہ بلوچ ءِ سوبمندی اِنت کہ یک وتگڑیں ریاست ءُ رستریں دژمنے ءِ پہ دیم پہ دیمی ءَ گوں ھواری، گوستانکی پجار ءُ راجی آجوئی ءِ لیکہ ءِ سر ءَ اوشتاتگ۔ مرچی راجی گھگیری ءُ وتی پجارگ یک شریں دورے ءَ گوازگ ءَ اِنت، بلّے اگاں زرمبشت ءِ درسیں پھناتاں کسانیں ایرادگری ءُ دلرنجی ھست اَنت بلے راجی لیکہ ءِ سر ءَ درس یکجاہ اَنت۔
بلوچ سروک ءَ گوشتگ کہ پہ راجی آجوئی ءِ گرگ ءَ ھژدری اِنت کہ زرمبشت ءِ درسیں پڑاں یکجھتی بہ بیت، پہ نزیکی ءُ ھمگرنچی ءَ کوشست بہ بیت، وھدے کہ مول یکے اِنت گڑا ایرادگری پہ زور ھلاس ءُ مٹ کنگ بنت۔ یکجھتی ءُ اتھاد تھنا گوں ھمگرنچی ءَ ودی بیت، جتائیں مارشت ءِ گل، پارٹی ءُ بھرگ پہ یک مزنیں مولے ءَ یکجاہ بہ بنت گڑا اے نزوری یے نہ اِنت بلکیں چونیں ھم جھدے ءَ سیاسی مھکمی ءُ بنیادی کرد ءَ پیلو کنت۔
ھلیل بلوچ ءَ گوشتگ کہ چونیں ھم سیاسی زرمبشتے ھما وھد ءَ سوبین بیت وھدے کہ آئی مول تچک بہ بیت ءُ سیاسی شوربندیانی رد ءَ دیم ءَ بہ جنزایت۔ راجی یکجھتی ھما وھد ءَ مھکم بیت وھدے زمہ وار راج ءِ تہ ءَ ھواریں بیسہ ودی بہ کن اَنت ءُ جھد ءَ سیاسی راھبند بہ ٹھین اَنت۔ اے نہ تھنا جھد ءِ پدیانکاں اکلاکی بنیاد ءَ مھکم کن اَنت بلکیں جھان ءِ تہ ءَ اے وڑیں گپ گیش گوں سنگینی ءَ چارگ بیت۔
بنشون: درشان اکس: رسانکدر
