جنیوا ءَ بلوچ نیشنل موومنٹ ءِ دری کارانی تک ءِ کارگشاد پھیم بلوچ ءَ اکوام متھدہ ءِ انسانی ھکانی کونسل ءِ دیوان ءَ تران کرتگ ءُ بلوچستان ءِ جاورانی سر ءَ بژن درشان کرتگ ءُ گوشتگ کہ بلوچستان ءَ زوریں بیگواھی، آزادھی ءُ درکانودی کوش برجاہ اَنت۔ سانمندیں کھول ھم ترسینگ بوگ ءَ اَنت۔
آئی ءَ گوشتگ کہ من بلوچستان ءَ انسانی ھکانی لگتمالیانی سر ءَ شمئے دلگوش ءَ گور کنگ لوٹ آں۔ ایمنسٹی انٹر نیشنل ءِ رپورٹانی رد ءَ اے دمگ ءَ زوریں بیگواھی، آزادھی ءُ درکانودی کوش برجاہ اَنت۔ پاکستانی پوج ءِ دست ءَ باز مردم آوار جنگ بوتگ کہ آ داں دیر ءَ بیگواہ کنگ بوتگ اَنت ءُ بازیں مردمانی جتائیں وھداں لاش دزکپتگ اَنت۔ ایمنسٹی انٹرنیشنل ءَ اے درچ کشگ ءُ چگل دیگ ءِ پالیسی لیک اتگ۔
پھیم بلوچ ءَ گوشتگ کہ ھیومین رائٹس کمیشن آپ پاکستان ءَ ھم وتی رپورٹانی رد ءَ زوریں بیگواھی ءِ درچ پیش کرتگ ءُ گوشتگ کہ زور بیگواھیں مردمانی کھول پہ وتی آزیزانی آجوئی ءَ درکپ اَنت گڑا گوں آیاں زوراکی کنگ بیت ءُ ترسینگ بنت۔
آئی ءَ گوشتگ کہ اے جیڑہ میان استمانی تک ءَ ھم دیم ءَ آرگ بوتگ۔ برتانیہ ءَ بلوچستان ءَ مچی کبرانی ھال ءِ اش کنگ ءِ سر ءَ بژن درشان کرتگ ءُ پہ انسانی ھکانی لگتمالیانی بابت ءَ گوں پاکستان ءَ گپ ءُ تران کرتگ۔ امریکہ ءَ ھم وتی سالی انسانی ھکانی رپورٹانی تہ ءَ کوش، زوریں بیگواھی ءُ آزاردھیانی ویل دیم ءَ آرتگ اَنت۔ یورپی یونین ءِ باسکیں ڈیھ نیدرلینڈز ءَ ھم ھمے ترس پدر کرتگ۔
اکوام متھدہ ءِ انسانی ھکانی کونسل ءَ تران کنوکاں چہ پاکستان ءَ اے جیڑھانی پٹ ءُ پول ءُ میان استمانی انسانی ھکانی کانود ءِ پاسداری ءِ لوٹ کرتگ۔
آئی ءَ گوشتگ کہ ما گوں کونسل ءَ لوٹ کن ایں کہ آ پٹ ءُ پول کنگ ءِ پلہ مرزی ءَ بہ کنت، پہ جست گرگ ءَ دلجمی بہ دنت ءُ پہ بلوچستان ءِ مھلوک ءِ بنکی ھکانی پھریزگ ءَ گامگیج بزور ایت۔
بنشون: درشان اکس: بی این ایم
