بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَ 25 مارچ چہ پاکستانءِ نیمگ ءَ بنگلہ دیش ءِ چکچینی روچ ءِ درگت ءَ وتی درشانے ءَ گوشتگ کہ 25 مارچ 1971 زرباری ایشیا ءِ گوستانک ءِ یک سکا بژنیگیں شپے۔ ھمے شپ ءَ پاکستانی پوج ءَ بنگلہ دیش ءَ ” آپریشن سرچ لائٹ ” بندات کرتگ اَت۔ اے کاروائی ءَ ھزارانی کچ ءَ بے میاریں مردم، نودربر، دانشور ءُ سیاسی کارکن جنگ بوتگ۔
آئی ءَ گوشتگ کہ اے ایوک ءَ یک پوجی کاروائی یے نہ بوتگ، بلکیں یک مزنیں کچے ءَ آزاردھی ءُ زوراکیانی مھمے بوتگ۔ ایشی مول یک راجے ءِ توار ءُ آئی جمھوری واھشتانی دارگ بوتگ، جھان ءَ درس دیستگ اَنت بلے سانمنداں سرجم ءَ انساپ نہ رستگ۔
ڈاکٹرنسیم بلوچ ءَ گوشتگ کہ مرچی ھم ھژدری اِنت کہ بنگلہ دیش اے جیڑہ ءَ اکوام متھدہ ءُ آدگہ میان استمانی ادارھاں دیم ءَ بیار ایت۔ پہ گوست ءَ انساپ ءُ باندات ءَ راستی ءِ منگ سکا ارزشت دار ایت۔ 1971 ءَ زمہ وارانی جست نہ گرگ ءِ مرچی ھم مارگ بوگ ءَ اِنت۔ ھما زوراکی کنوکاں کمک رستگ ءُ ھما روشت برجاہ اِنت۔
بی این ایم ءِ چیئرمین ءَ بلوچستانءَ پاکستانی پوج ءِ زوراکیانی درور داتگ ءُ گوشتگ کہ بلوچستان ءَ ھم انسانی ھکانی جیڑہ، انچوش کہ زوریں بیگواھی ءُ درکانودی کوش ھمے درچ ءِ یک منانکے۔
ڈاکٹر نسیم بلوچ ءَ گوشتگ کہ پہ انساپ ءَ ٹال ءُ مٹول کنگ انساپ ءِ نہ منگ اِنت۔ اے تھنا گوں بنگلہ دیش ءِ مردماں نہ بوتگ بلکیں گوں ھمک ھما مردم ءَ ناھکی اِنت کہ آ مرچی ھم زوراکیانی آماچ اِنت۔ اے ھژدری اِنت کہ 1971 ءِ ویل منگ بہ بیت ءُ ایشی زمہ وار جست گرگ بہ بنت دانکہ دیم ءَ اے وڑیں ویل دارگ بہ بنت۔
