دالبندین ءِ جاہ منند پاکستانی پوج ءِ دست ءَ زور بیگواھیں گلام ھزرت ءِ کھول ءَ پریس کانپرنس کرتگ ءُ گوشتگ کہ گلام ھزرت یک اکتوبر 2018 ءَ چہ دالبندین ءِ ڈنو ءَ بیگاہ ءِ پنچ ءَ زور بیگواہ کنگ بوتگ، پہ آئی آجوئی ءَ ما گوستگیں ھشت سال اِنت کہ کوشست کنگ ءَ ایں، بلے چہ بد بھتی ءَ ھچ جاہ ءَ مئے گپ گوش دارگ بوگ ءَ نہ اِنت۔
آئی ءَ گوشتگ کہ گلام ھزرت ءِ زوریں بیگواھی ءِ بابت ءَ ما دالبندین ءِ کینٹ ءَ ھم لوٹائنگ بوتگ ایں، ادارھاں مارا شال ءَ لوٹ اتگ۔ دوبر ءَ گوں ھاران ءِ ڈپٹی کمشنر ءَ گپ ءُ تران بوتگ۔ مارا چہ ھندی سروکانی نیمگ ءَ دلجمی دیگ بوتگ، بلے انگت ءَ ھچ وڑیں گامگیج زورگ نہ بوتگ۔
کھول ءَ گوشتگ کہ ما یکبرے پد ءَ ھمے پریس کانپرنس ءِ رد ءَ گوں ادارھاں لوٹ کن این کہ گلام ھزرت دیم ءَ آرگ بہ بیت۔ اگاں آئی سر ءَ چونیں ھم بھتامے ھست گڑا آئین ءُ کانود ءِ رد ءَ آمیدگس ءَ پیش کنگ بہ بیت۔
آئی ءَ گوں انسانی ھکانی ھندی ءُ میان استمانی گل، پاکستان ءِ ادارہ ءُ سیول سوسائٹی ءَ لوٹ کرتگ کہ آ گلام ھزرت ءِ زوریں بیگواھی ءِ سر ءَ دلگوش ءَ گور بہ کن اَنت ءُ پہ آئی آجوئی ءَ توار چست کنگ ءَ وتی کرد ءَ پیلو بہ کن اَنت۔
بنشون: پریس کانپرنس. اکس: اھوالکار
