بلوچستان لبریشن پرنٹ ءِ جارکش میجر گھرام بلوچ ءَ وتی درشان ءَ گوشتگ کہ سرمچاراں شازدہ مارچ 2026 ءَ تمپ ءِ ھند ملانٹ ءَ برجاھیں پاکستانی پوج ءِ بنجل ءِ سر ءَ اُرش کرتگ۔ سرمچارانی ٹولیاں شوربندی ءِ رد ءَ جتائیں نیمگاں بنجل انگیر کرتگ ءُ چہ نزیک ءَ ترندی ءَ اُرش کرتگ۔
آئی گوشتگ کہ اے کاروائی ءَ سرمچاراں بی-10 82 ایم ایم راکٹ، اسنائپر، آر پی جی ءُ گرنیڈ لانچر ءَ ھوار گوں آدگہ ٹوھیں سلاھاں زورگریں پوج ءِ بنجل نشانگ کرتگ۔ چہ ایشی ءَ دژمنیں پوج ءِ کم چہ کم سَے کارمند جاھی مرتگ ءُ چار سکا ٹپی بوتگ۔
آئی گوشتگ کہ سرمچاراں پہ چاریگی ءَ بنجل ءِ سر ءَ جتگیں چاریگی کیمرہ نشانگ کرتگ ءُ تباہ کرتگ اَنت۔ تراکانی آسر ءَ بنجل ءِ یک بھرے ءَ سکا تاوان بوتگ۔ رند ءَ پہ پوج ءِ مرتگین ءُ ٹپی بوتگیں کارمندانی برگ ءَ ھیلی کاپٹر آتکگ۔
جارکش ءَ گوشتگ کہ یک دگہ کاروائی یے ءَ سرمچاراں ھبدہ مارچ ءِ سھب ءِ ھپت ءَ واشک ءِ ھند گراڑی ءَ گل ءِ چیریں بھرگ ءِ ھال دیگ ءِ پژدر ءَ ریاست ءِ چیردستی ءَ کشندہ ٹولی ءِ کارمندانی بگیری ءَ ترندیں کاروائی کرتگ۔ زورگریں پوج ءِ چیردستی ءَ سرگرمیں کشندہ ٹولی ءِ کارمنداں سی پیک دگ بستگ ءُ راھگوزیں گاڑیانی ڈرائیوراں ترسینگ ءُ پہ زور چہ آیاں زر گرگ ءَ بوتگ اَنت کہ سرمچارانی یک ٹولی یے ھمے جاہ ءَ سر بوتگ ءُ کشندہ ٹولی ءِ کارمند انگیر کرتگ ءُ نشانگ کرتگ اَنت۔ اے کاروائی ءِ آسر ءَ کشندہ ٹولی ءِ سے کارمند مرتگ ءُ یکے سرمچاراں دزگیر کرتگ کہ آ اے وھد ءَ گل ءِ کر ءَ بندیگ اِنت۔
آئی گوشتگ کہ اے سلاہ بندیں ٹولی سردار الی ھیدر مھمد ھسنی ءُ ریاست ءِ چیردستی ءَ چہ گاڑیاں زر گرگ ءُ بلوچ دژمنیں سرگرمیاں ھوار اِنت۔ اے ٹولی ءِ سروکی ءَ سرور نامیں کارمندے کنگ ءَ بوتگ۔ مرتگیں کارمنداں یکے ءِ نام کھور پنام منان ء مرید اِنت کہ مشکے ءِ جھمنند اِنت ءُ دگہ دو مرتگیں کارمند انگت پجارگ نہ بوتگ۔ دزگیر کنگ بوتگیں کارمند ءِ نام چاکر ء شیر مھمد اِنت کہ ناگ ءِ جھمنند اِنت۔ چہ آئی جست ءُ پرس برجاہ اِنت۔ سرمچاراں کاروائی ءِ میان ءَ اے کارمندانی سلاہ ءُ جنگی سامان دستیگ کرتگ اَنت ءُ آیانی گاڑی مانداشتگ۔
میجر گھرام بلوچ ءَ درشان ءِ گڈی ءَ دوئیں اُرشانی زمہ واری من اِتگ ءُ گوشتگ کہ ما تچک ءَ گوش ایں کہ کشندہ ٹولی ءِ کارمند مئے نشانگ ءَ اَنت۔ کسے ھم بلوچ راجی زرمبشت ءِ بگیری ئیں سرگرمیں کاراں ھوار بیت آ وتی گڈی آسر ءَ سر کنگ بیت۔
بنشون: درشان اکس: زرمبش
