چہ جتائیں ھنداں پاکستانی پوج ءِ دست ءَ بیگواہ کنگ بوتگیں پاتمہ بلوچ، کمبر بلوچ، زئیم شھیب، سپر ھان بلوچ ءُ ھاتر بلوچ آجو بوتگ اَنت۔
اھوالکار ءِ رد ءَ آجو بوتگیں پاتمہ بلوچ ء مھمد جان پَنجگُور ایسائی ءِ جھمنند اِنت ءُ چہ ھب چوکی ءَ پاکستانی پوج ءَ سیزدہ جنوری 2026 ءَ آوار جنگ ءَ پد بیگواہ کرتگ اَت۔ آ شازدہ مارچ ءَ چہ ھب چوکی ءَ آجو بوتگ۔
ھمے وڑ ءَ چہ گْوادر ءِ ھند جیونی پانوان ءَ پاکستانی پوج ءِ دست ءَ آوار جنگ بوتگیں دوئیں ورنا زئیم بلوچ ء مھمد راھی ءُ کمبر بلوچ ء امام بلوچ آجو بوتگ اَنت۔ آجو بوتگیں زئیم بلوچ ءُ کمبر بلوچ ءَ پاکستانی پوج ءَ دہ مارچ 2026 ءَ بیگواہ کرتگ اَت۔ دوئیں ورنا شازدہ مارچ ءَ آجو بوتگ ءُ وتی گس ءَ سر بوتگ اَنت۔
دومی نیمگ ءَ چہ شال ءَ آوار جنگ بوتگیں سپر ھان ءُ شھیب کمبرانی آجو بوتگ ءُ وتی گس ءَ سر بوتگ اَنت۔ آجو بوتگیں شھیب ءُ سپر ھان ءَ دو مارچ ءَ پاکستانی پوج ءَ چہ شال ءِ ھند کلی کمبرانی ءَ آوار جتگ ءُ بیگواہ کرتگ اِت اَنت۔
دومی نیمگ ءَ چہ تُربَت ءَ کشندہ ٹولی ءِ کارمندانی دست ءَ بیگواہ کنگ بوتگیں ھاتر بلوچ آجو بوتگ۔
آجو بوتگیں ھاتر بلوچ ءَ کشندہ ٹولی ءِ کارمنداں 3 جون 2025 ءَ آوار جنگ ءَ پد بیگواہ کرتگ اَت۔ مرچی آجو بوتگ ءُ وتی گس ءَ سر بوتگ۔
بنشون: رسانکدر اکس: رسانکدر
