شال: پہ زوربیگواھیں مردمانی پدجنگ ءَ وائس پار بلوچ مسنگ پرسنز (وی بی ایم پی) ءِ زھرشانی گدان ءَ 6106 روچ سرجم بوتگ کہ شال پریس کلب ءِ دیم ءَ برجاہ بوتگ۔ جتائیں بھرگاں سیادی داروکیں مردم گدان ءَ آتکگ اَنت ءُ گوں بیگواھیں مردمانی کھولاں ھمدردی درشان کرتگ۔
اے درگت ءَ دوازدہ مارچ ءَ شپ ءِ دو ءَ چہ شال ءَ منو جان دگ ءَ سی ٹی ڈی ءُ آدگہ ادارھانی دست ءَ زوربیگواھیں ورنا سیپ اللہ ء اتااللہ ءِ کھول گدان ءَ آتکگ۔
کھول ءِ گوشگ اِنت کہ سیپ اللہ ھما وھد ءَ آوار جنگ ءُ بیگواہ کنگ بوتگ کہ آ چہ ایوب اسٹیڈیم ءَ پٹبال گوازی ءَ پد وتی سنگتانی ھواری ءَ واتر گس ءَ پیداک بوتگ۔ اے ویل ءَ لھتیں روچ گوزگ ءَ ابید انگت آئی بابت ءَ مارا سرپدی دیگ نہ بوتگ ءُ نا کہ پولیس تانہ ءَ سیپ اللہ ءِ زوریں بیگواھی ءِ ایپ آئی آر ءَ نبشتہ کنگ ءَ اَنت۔ چہ ایشی ءَ مئے کھول سکا جنجالانی دیمپان اِنت۔
کھول ءِ گوشگ اِنت کہ سیپ اللہ ءِ زوریں بیگواھی ءِ کیس وی بی ایم پی ءِ کرا یاداشت کرتگ۔
وائس فار بلوچ مسنگ پرسنز ءِ چیرمین نسراللہ بلوچ ءَ سیپ اللہ ءِ کھول دلجمی داتگ کہ سیپ اللہ ءِ کیس گل ءِ نیمگ ءَ پہ زوربیگواھیں مردماں جوڑ کنگ بوتگیں کمیشن ءُ دمگی سرکار ءَ سر کنگ بیت۔ پہ آئی آجوئی ءَ ھمک جاہ ءَ توار چست کن ایں۔
نسراللہ بلوچ ءَ گوں سرکار ءُ ادارھاں لوٹ کرتگ کہ بیگواھیں مردم زوت دیم ءَ آرگ بہ بنت ءُ آیانی کھولانی جنجال ھلاس کنگ بہ بنت۔
بنشون: درشان اکس: وی بی ایم پی
