بلوچ یکجھتی کمیٹی ( بی وائی سی ) ءَ وتی درشانے ءَ گوشتگ کہ مھمد اسمائیل ء لشکری ھان کبدانی آئی امر بیست ءُ چار سال اِنت دکاندار ءُ مزدورے۔ 9 مارچ 2026 ءِ سھب ءَ ھشت ءُ پانزدہ ءَ ھاران شھر ءَ کشندہ ٹولی ءَ نشانگ کرتگ ءُ کشتگ۔
آئی ءَ گوشتگ کہ مھمد اسمائیل چہ ایشی ءَ پیش جون 2025 ءَ زور بیگواہ کنگ بوتگ ءُ جنوری 2026 ءَ یل کنگ بوتگ۔ لھتیں ھپتگانی میان ءَ آ دوبر نشانگ کنگ ءُ کشگ بوتگ۔
بلوچ یکجھتی کمیٹی ءَ اے ویل ایرجتگ ءُ گوشتگ کہ اے بلوچ مھلوک ءِ ترسینگ ءُ آیانی توار ءِ دارگ ءِ کوشست اِنت۔ اد ءَ رمزان ءِ پاکیں ماہ ءَ ھم بلوچ ورنا زور بیگواہ کنگ بوگ ءَ اَنت، نشانگ کنگ ءُ کشگ بوگ ءَ اَنت۔
آئی ءَ گوں میان استمانی تک ءُ انسانی ھکانی پدجنوکاں لوٹ کرتگ کہ آ زوت دلگوش بدے اَنت ءُ انساپ، شرپ ءُ آجوئی ءِ جھد ءَ بلوچ مھلوک ءِ گون ءَ بہ اوشت اَنت۔
بنشون: درشان اکس: بی وائی سی
