شال ءَ پہ زور بیگواھیں مردمانی آجوئی ءَ وائس پار بلوچ مسنگ پرسنز ( وی بی ایم پی ) ءِ زھرشانی گدان ءَ 6104 روچ سرجم بوتگ کہ شال پریس کلب ءِ دیم ءَ برجاہ اِنت۔ مرچی وی بی ایم پی ءِ چیئرمین نسر اللہ بلوچ گدان ءَ ساڑی بوتگ۔
جتا جتائیں بھرگاں سیادی داروکیں مردم پہ ھمدردی درشان کنگ ءَ گدان ءَ اتکگ اَنت۔
وی بی ایم پی ءِ چیئرمین نسر اللہ بلوچ ءَ تران کرتگ ءُ گوشتگ کہ زوریں بیگواھی درکانودی گامگیجے ءُ شھریانی بنکی ھکانی بگیری اِنت۔ بلوچستان ءَ ھزارانی کچ ءَ زور بیگواھیں مردمانی کھول گوں رنجاں زند گوازینگ ءَ لاچار اَنت۔
آئی ءَ گوشتگ کہ ریاست گوں زور بیگواھیں مردمانی کھولاں ڈیھ ءِ کانود ءِ رد ءَ پیش بہ بیت، اگاں چونیں ھم مردمے ریاستی ادارھاں دزگیر کرتگ گڑا آ بیست ءُ چار ادارانی میان ءَ آمیدگس ءَ پیش کنگ بہ بیت۔
نسر اللہ بلوچ ءَ لوٹ کرتگ کہ زوریں بیگواھی ءُ بیگواھیں بلوچانی درکانودی کوش زوت بند کنگ بہ بیت۔ پہ زور بیگواھیں مردمانی آجوئی ءَ دلجمی دیگ بہ بیت ءُ پہ اے جیڑہ ءِ گیش ءُ گیوار کنگ ءَ کانود ءِرد ءَ گامگیج زورگ بہ بیت۔
