بلوچ اسٹوڈنٹس ایکشن کمیٹی ءَ وتی درشانےءَ گوشتگ کہ چہ بلوچ اسٹوڈنٹس ایکشن کمیٹی ءِ نیمگ ءَھزدارءَ ھشت مارچ زالبولانی جھانی روچ ءِدرگت ءَ یک مراگشے برجم دارگ بیتگ۔ دیوان ءِ گیچنی مھمان بنجاھی کماش اُزیر بلوچ بوتگ۔
مراگش جتائیں بھرانی تہ ءَ بوتگ کہ آھانی تہ ءَ گُشتانک، پینل ڈسکشن، ڈاکومنٹری، کسمانک، پنتاک ءُ پٹ ءُپولی تاک ھوار بوتگ اَنت۔ مراگش ءِ بندات چہ راجی سوت ءَ پد پٹ ءُ پولی تاک ءُ پنتاک وانگ بوتگ۔
زالبولانی جھانی روچ ءِ درگت ءَ جوڑ کتگیں ڈاکومنٹری پیش دارگ بوتگ، چرائی ءَ پد مراگش ءَ پینل ترانے ھوار بوتگ کہ آئی ءِ مھمان سپیہ بلوچ ءُ اُزیپہ بلوچ ءُ مھماندار وسیم بلوچ بوتگ ۔ پینل ڈسکشن ءَ سنگتاں زالبولانی جھانی روچ ءِ درگت ءَ گپ ءُ تران کُتگ ءُ ھستیں وھد ءَ بلوچ زالبولانی ھک ءُ جھد ءِ سر ءَ وتی ھیال درشان کتگ اَنت۔
آیانی گوشتگ کہ 1908 ءُ پدا 1912 ءَ زالبولانی بِندات بیوکیں سیاسی زرمبشتاں ھما وھد ءِ زوراکی پروش داتگ اَنت ءُ راجمان ءِ تہ ءَ پہ زالبولانی سیاسی ھکانی پھریزگ ءَ دگانی سر ءَ اتکگ ءُ جھد کتگ۔ھمایانی برورد ءَ اے زرمبشت روان کنت ءُدیمتر ءَ 1917 ءَ اولی مزن جنگ ءِ تہ ءَ روس ءِ زالبول زارھکومت ءِ بگیری ءَ پہ ورگ ءُ وردن ءُایمنی ءَ پاد کائینت۔ دیمتر ءَ بالشویک پاٹی اے زھرشانیانی نام ءَ 1922 ءَ ھشت مارچ ءَ زالبولانی روچ من ایت ءُ اے روچ ءَ دار ایت کہ دیمتر ءَ 1975 ءَ یونائٹڈ نیشن ھم اے روچ ءَ زیر ایت ءُ جھان ءَ دار ایت۔ ھمے پیم بلوچ زالبول ھم بیست ءُ یکمی کرن ءَ وتی راجمانی ءُ سیاسی ھکانی پھریزگ ءَ جھد کن اَنت ءُ راجمان ءِ ھمک پِڑاں وتی بھرشت ءِ دیگ ءَ سوبین بنت۔ اے ھمے سیاسی جھد ءِ برورد اِنت زالبولاں زُرتگ ءُ وتی جھد ءُ ھمت ءَ گوں اے راجمان ءَ وت ءَ منارینتگ۔
مراگش ءِ دیمتری بھر گُشتانک بوتگ کہ بنجاھی کماش ءَ تران کنان ءَ گوْشتگ اے روچ مرچی جھان ءَ پہ زالبولانی راجمانی ءُ سیاسی ھکانی پھریزگ ءَ دارگ بیگءَ اِنت، اے ھما گوست ءِ دلیریں زالبولانی جھدانی برورد اِنت کہ راجمان ءَ نہ بروبری ءِ بگیری ءَ اوشتاتگ ءُ جھد کتگ۔ مرچی کہ دنیا ءَ بازیں جاھاں زالبول راجمانی ءُ سیاسی ھوالہ ءَ لگتمال کنگ بوتگ اَنت بلے پیش ءَ چوش نہ بیتگ، وھدیکہ شکار ءِ دورءُباریگ بیت ءُ اود ءَ کہ کاربھر بنت، مردین ءِ کار شکار ءُ زالبول ءَ کِشت ءُ کشاری ءُ راجمانی کارانی جنزینگ ءِ زمہ گون بیت، ایشی ءَ پد دنیا ءَجتائیں مٹی کئیت ءُ ھمے روانی ءَ زالبولانی ھک ایر جنگ بنت ءُ ایشی ءِ تہ ءَ دین، سامراجی تاگت، کاروباری تبک، زوراوری ءِ ڈسکورساں ھوار ایدگہ تاگت ھوار اَنت۔
کماش ءَ دیمتر ءَ گوْشت کہ دنیا ءَ کہ زالبول ایردست کنگ بوتگ اَنت گڑا بلوچ راجمان ھم چہ اے ساناں رک اِت نہ کنت بلے دنیا ءَ بازیں راج ھست اَنت کہ آھانی گور ءَ زالبول ءِ لگتمالی کم گِندگ کئیت ءُ اگاں ھیرتی ءَ چارگ بہ بیت گڑا بلوچ راجمان ءَ ھم زالبولانی ھکانی لگتمالی کم گِندگ کئیت، گوستانکی دپترانی وانگ ءُ ھستیں دور ءَ رواجانی چارگ ءَ پد ھمے پدربیت کہ بلوچ راجمان ءَ زالبول ءّ ناں تھنا اِزت ءُ شرپ ھست بلکیں آھاں راجمانی ھک ءُ وتواکی ھم دیگ بیت۔ چوشکہ گوست ءَ مئے رواجانی چارگ ءَ پد گِندگ بیت کہ بلوچ زالبول بازیں دمگانی سروک بیتگ اَنت، لشکرانی سروک ءُ رھشون بیتگ اَنت کہ دُژمن ءِ بگیری ءَ گھگیری اِش کتگ۔ بلے انگریز ءُ ایدگہ دری تاگتانی آیگ ءَ پد مرچی بازیں رواجے مٹ کنگ بیتگ، دری وھدیکہ اد ءَ اتکگ اَنت گڑا آھاں بلوچ راجمانی جوڑشت مٹ کتگ ءُ وتی رنگ ءَ پیش کتگ دانکہ اے راج ءِ سر ءَ شرتر ھگمرانی کت بہ کن اَنت۔
بنشون: درشان اکس: بساک
