شال ءَ پہ زور بیگواھیں مردمانی آجوئی ءَ وائس پار بلوچ مسنگ پرسنز ( وی بی ایم پی ) ءِ زھرشانی گدان ءَ 6102 روچ سرجم بوتگ۔آدینگ ءِ روچ ءَ نیاز مھمد گدان ءَ ساڑی بوتگ۔
بی ایس او ءِ پیشگیں چیئرمین مھیم بلوچ گدان ءَ اتکگ ءُ گوں زور بیگواھیں مردمانی کھولاں ھمدردی درشان کرتگ۔ آئی ءَ زوریں بیگواھی ءِ ھلاسی ءُ زور بیگواھیں مردمانی آجوئی ءِ لوٹ کرتگ۔
وی بی ایم پی ءِ چیئرمین نسر اللہ بلوچ ءَ زور بیگواھیں مردمانی کوش ءِ سر ءَ بژن درشان کرتگ ءُ گوشتگ کہ بلوچستان ءِ مکُران ڈویژن ءَ گوستگیں دو ماھانی میان ءَ 21 ءَ گیش ورنایانی لاش دزکپتگ اَنت۔
آئی ءَ گوشتگ کہ چہ اے مردماں بازیں مردم پیسر ءَ پوج ءِ دست ءَ آوار جنگ ءُ پد ءَبیگواہ کنگ بوتگ اَنت ءُ رند ءَ آیانی تیرسپتگیں لاش چگل دیگ بوتگ اَنت۔ اے ویل بلوچستان ءَ انسانانی جانانی زوالی ءِ گیش بوگ ءِ درچ ءَ پیش دار ایت۔
نسر اللہ بلوچ ءَ اے ویل ایر جتگ اَنت ءُ چہ سرکار ءَ لوٹ کرتگ کہ ایشانی بابت ءَ گوں دلجمی ءَ پٹ ءُ پول کنگ بہ بیت ءُ دانکہ راستی دیم ءَ بیت ءُ ایشی زمہ وار جست گرگ بہ بنت۔
بنشون؛ درشان اکس: وی بی ایم پی
