کیچ ءِ شھر تربت ءَ پاکستانی پوج ءَ سئید بی بی ءِ گس ءَ بیڑ برتگ ءُ زوراکی کرتگ۔
بنشون ءِ رد ءَ پوج ءَ دوشی دوازدہ ءِ نزیک ءَ گس ءَ بیڑ برتگ ءُ گس پٹ ءُ پول کرتگ اَنت۔
سئید بی بی ءِ نام چہ سرکار ءِ نیمگ ءَ پورتھ شیڈول ءَ ھم ھوار کنگ بوتگ ءُ آ ھمک ھپتگ ءَ سی ٹی ڈی ءِ کِر ءَ پہ پیشی ءَ ھم روگ ءَ اِنت۔
اے بابت ءَ سئید بی بی ءِ گوشگ اِنت کہ دوشی سی ٹی ڈی ءُ چیریں ادارھانی کارمنداں گس ءَ بیڑ برتگ ءُ زھگ ءُ زالبول چہ واب ءَ پاد کرتگ اَنت۔ موبائلانی پٹگ ءِ ھواری ءَ گسانی سامان ھم چگل دیاں کرتگ اَنت ءُ گوں کھول ءَ زوراکی کرتگ۔
آئی ءِ گوشگ اِنت کہ کارمنداں من ءَ ناشری ءِ کمکار ءُ گوں ڈاکٹر ماہ رنگ ءَ رھوت کنگ ءَ ھوار دومی ڈاکٹر ماہ رنگ جوڑ بوگ ءِ بھتام جتگ۔
سئید بی بی ءِ گوشگ اِنت کہ آیاں من ءَ بیگواھیں ساجد اھمد ءِ بابت ءَ جست کرتگ ءُ منی برات ڈاکٹر ھنیپ شریپ ءِ بابت ءَ جست گپتگ ءُ آئی نمبر زرتگ۔من ءَ ھمے گوشگ بوتگ کہ ترا چہ ڈن ءِ ڈیھاں پنڈ رسگ ءَ اِنت۔
آئی ءَ گوشتگ کہ منی نام پیسر ءَ ھم پورتھ شیڈول ءَ ھوار اِنت ءُ من ھمک وھد ءَ سی ٹی ڈی ءِ کِر ءَ پیشی ءَ ھم روگ ءَ آں۔ چہ ایشی ءَ ابید گس ءَ بیڑ برگ ءُ کھول ءِ ترسینگ ءُ سامانانی پروشگ چہ پھم ءَ ڈن اِنت۔
بنشون: رسانکدر اکس: رسانکدر
