بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَ وتی درشانے ءَ گوشتگ کہ پنجگور ءَ تھنا یک ماھے ءَ بیست ورنایانی کوش ھمے گپ ءَ پدر کنت کہ پاکستان بلوچ راج ءِ گون ءَ کجام کساس ءَ کینگدار اِنت۔
آئی ءَ گوشتگ کہ پاکستان نہ ھکی ئیں اسلامی ریاستے ءُ نہ یک جمھوری ملکے۔ اے یک وتگڑیں ملکے کہ بازیں راج بلوچ، سندھی، پشتون، کشمیری ءُ آدگہ راجانی سرڈگارانی سر ءَ زورگپتی ءَ گوں ٹھ اتگ۔
ڈاکٹر نسیم بلوچ ءَ گوشتگ کہ گوں اے راجاں نوک آبادکاری ءِ وڑ ءَ پیش بوگ ءَ اِنت، اود ءَ ریاست، یک زورگریں ریاستے ءِ وڑ ءَ وتی پیسلھاں گوں زور، زوریں بیگواھی ءُ کوش ءِ رد ءَ برجاہ دار ایت۔
آئی ءَ گوشتگ کہ پمشکا اے ھیرانی گپے نہ اِنت کہ اے راج اے زور ءُ زورگپتی ءَ رد کنگ ءَ اَنت۔ ھاس بلوچ مھلوک ءَ بلوچستان ءِ پہ زور ھوار کنگ ءِ بنداتی روچ ءَ وتی آجوئی ءِ لوٹ کرتگ ءُ گھگیری کرتگ، اے جھد مرچی ھم برجاہ اِنت۔
بنشون: درشان. اکس: دامگ
