بلوچ یکجھتی کمیٹی ( بی وائی سی ) ءَ وتی درشان ءَ گوشتگ کہ مھبوب بلوچ ء امان اللہ پنجگور ءِ ھند گوارگو ءِ جاہ منند اِنت، ھشت ماہ پیش زور بیگواہ کنگ بوتگ، پاکستانی پوج ءَ کشتگ۔
آئی ءَ گوشتگ کہ پاکستانی پوج وت ءَ پھازدارے گوش ایت، راستی ھمیش اِنت کہ آ اے پوشاکانی تہ ءَ کشندھی کنگ ءَ اِنت۔ بلوچستان ءِ مردم چہ ایشاں ترس اَنت چی ءَ کہ بلوچستان ءَ زوراکیانی زمہ وار ھمے ادارہ اَنت۔
آئی ءَ گوشتگ کہ بلوچستان ءَ ایپ سی ءُ آئی پلہ مرزیں کشندہ ٹولی سرگرم اَنت، آ بلوچ نودربر، دانشور ءُ سیاسی کارکناں نشانگ کنگ ءَ اَنت۔ درکانودی کوش ءَ ابید زوریں بیگواھی، زالبولانی ترسینگ ءُ بیھار دیگ ءُ آدگہ درکانودی سرگرمیاں انچوش کہ نشہ ءِ کاچاکی ءُ جتائیں میارباریانی ھوار بوگ ءِ بھتام اِش سر ءَ ھست۔
آئی ءَ گوشتگ کہ انوگیں ھپتگاں بلوچستان ءَ ریاستی پلہ مرزیں کشندہ ٹولی ءُ پاکستانی پوج ءِ دست ءَ نشانگ کنگ ءِ ویل ترسناکیں ھدے ءَ گیش بوتگ اَنت۔ اے درکانودی گامگیج نہ تھنا استان ءِ ایمنی ءَ سانمند کنگ ءَ اَنت، بلکیں بنکی انسانی ھکانی ناھکیں بگیری اِنت۔
بی وائی سی ءَ گوں درسیں انسانی ھکانی گل ءُ میان استمانی تک ءَ لوٹ کرتگ کہ آ اے ویلانی بابت ءَ پٹ ءُ پول بہ کن اَنت ءُ پاکستان ریاست ءَ زور بدے اَنت کہ بلوچستان ءَ بلوچ چکچینی زوت دارگ بہ بیت ءُ ایشی ھواریں مردم جست گرگ بہ بنت۔
بنشون: درشان اکس: بی وائی سی
