بلوچ نیشنل موومنٹ ( بی این ایم ) ءِ انسانی ھکانی ادارہ پانک ءَ آواران ءِ جاہ منندیں دوئیں براتانی درکانودی کوش ایر جتگ ءُ گوشتگ کہ پاکستانی پوج ءَ زوریں بیگواھی ءَ پد کشتگ اَنت۔ اے ویل بلوچستان ءَ برجاھیں ناھکیں انسانی ھکانی لگتمالیاں پیش دار ایت۔
پانک ءِ گوشگ اِنت کہ نادل بلوچ ء زباد آواران ءِ ھند جاؤ، کورک ءِ جاہ منند اِنت۔ 23 نومبر 2025 پاکستانی پوج ءَ چہ واجہ ءِ باگ بازار ءَ زور بیگواہ کرتگ۔ ھندی مردمانی گوشگ اِنت کہ نادل بلوچ بے ارزی ءُ درکانودی آوار جنگ بوتگ۔
آئی ءَ گوشتگ کہ چار ماہ ءِ درکانودی بیگواھی ءَ پد آئی تیرسپتگیں لاش چہ جاؤ، کوٹو ءَ دزکپتگ۔ چہ لاش ءَ زانگ بوتگ کہ آ چہ کوش ءَ پیش آزار دیگ بوتگ۔
پانک ءَ گوشتگ کہ ھمے وڑ ءَ شیرجان ء زباد آواران ءِ ھند جاؤ، کورک ءِ جاہ منند اِنت، 21 نومبر 2025 ءَ چہ ھب چوکی ءِ بازار ءَ ریاستی ادارھاں زور بیگواہ کرتگ۔داں چار ماہ ءَ آئی ءِ ھچ وڑیں ھال نہ بوتگ، چہ ایشی ءَ کھول سکا جنجال بوتگ۔ پد ءَ آئی ءِ لاش چہ آواران ءِ ھند تیرتیج ءَ گوں دگہ سے مردمانی ھواری ءَ دزکپتگ۔
پانک ءَ گوشتگ کہ دوئیں براتانی کوش بلوچستان ءَ کشگ ءُ چگل دیگ ءِ پالیسی ءَ پیش دار ایت کہ مردم زور بیگواہ کنگ ءُ داں دیر ءَ درکانودی بیگواھی ءَ پد آیانی لاش چگل دیگ بیت۔
بنشون: درشان اکس: پانک
