بلوچ یکجھتی کمیٹی ءَ وتی درشانے ءَ گوشتگ کہ ھمل ھسنی ء سمد ھسنی وکیلے، 6 مارچ 2026 ءَ پَنجگُور ءِ سبز کوہ، پلنتک ءَ پاکستانی پوج ءَ تیرگواری کرتگ ءُ کشتگ۔ آ بے میاریں مردمے ءُ آئی ءَ سلاہ گوں نہ بوتگ۔آ یک بلوچ ورنایے ءُ بلوچستان ءَ بلوچ بوگ ھم میارے جوڑ بوتگ۔
آئی ءَ گوشتگ کہ ھمل ھسنی ءِ کوش ھما درچ ءِ بھر اَنت چہ سالاں برجاہ اِنت ءُ انسانی ھکانی کارکن نشانگ بوگ ءَ اَنت۔ گیشتر بلوچ چہ گس، راہ ءُ چوکیاں چست کنگ بنت ءُ رند ءَ آیانی لاش چگل دیگ بنت۔ باز بر ءَ آیاں دروگیں میڑاں کش اَنت ءُ ناشرکاری ءِ نام ءَ دے اَنت۔ سانمندیں کھول چہ ترس ءَ بے توار بنت۔
آئی ءَ گوشتگ کہ بلوچستان ءَ پہ اھوالکاراں ھم جاور ناگیگ اَنت۔ دری اھوالکاران ءَ اد ءَ آھگ ءِ موکل نیست ءُ اگاں ھندی اھوالکار رپوٹنگ بہ کن اَنت گڑا پہ آیاں ترس ودی بیت۔
بی وائی سی ءَ گوں انسانی ھکانی میان استمانی گل، اکوام متھدہ ءِ انسانی ھکانی کونسل، ایمنسٹی انٹرنیشنل ءُ ھیومن رائٹس واچ ءَ لوٹ کرتگ کہ آ اے جیڑہ ءِ سر ءَ گوں سنگینی ءَ دلگوش بدے اَنت ءُ بلوچستان ءِ جاورانی بابت ءَ پٹ ءُ پول بہ کن اَنت۔ اگاں جھان بے توار بہ بیت گڑا اے وڑیں ویل برجاہ بنت۔
بنشون: درشان اکس: بی وائی سی
