بلوچ نیشنل موومنٹ ( بی این ایم ) ءِ انسانی ھکانی ادارہ پانک ءَ وتی درشانے ءَ گوشتگ کہ پنجگور ءِ ھند پروم سبزل بازار ءِ جاہ منندیں سے ورنائیں ڈرائیور امرجان بلوچ، زاکر بلوچ، نیاز بلوچ ءَ پنچ مارچ ءَ پروم ءِ میتگ کلیری ءَ ریاست ءِ پلہ مرزیں کشندہ ٹولی ءَ تیرگواری کرتگ ءُ کشتگ۔
آئی ءَ گوشتگ کہ امرجان ء الی، زاکر بلوچ ء ابدین ءُ نیاز بلوچ ء ھاجی اللہ بکش پہ وتی کھول ءِ والینگ ءَ سیمسر ءَ ڈرائیوری کنگ ءَ بوتگ اَنت۔
پانک ءِ رد ءَ ویل ءَ پد سے ئیں مردمانی لاش پروم ءِ بنجل ءَ برگ بوتگ اَنت ءُ گوں آیانی کھول ءَ رھوت کرتگ ءُ پہ لاشانی دزگرگ ءَ لوٹائینتگ اَنت۔ وھدے کہ کھول پہ لاشانی دزگرگ ءَ بنجل ءَ شتگ اَنت گڑا پاکستانی پوج ءَ آیان ءَ زور داتگ کہ شما دز رند بدے اِت کہ اے مردم ریاست ءِ بگیری ءَ کاراں ھوار بوتگ اَنت ءُ ناشرکار اَنت۔
آئی ءِ گوشگ اِنت کہ سانمندیں کھولاں دز رند نہ داتگ ءُ آیانی سر ءَ جتگیں بھتام نہ منّ اتگ اَنت۔ چہ کھولانی نہ منّگ ءَ پد ءَ 6 مارچ2026 ءَ سے ئیں ورنایانی لاش کھولانی دست ءَ دیگ بوتگ اَنت۔
پانک ءَ ایر جتگ ءُ گوشتگ کہ اے ویل انسانی ھکانی گنتریں لگتمالی اِنت کہ درکانودی کوش، سانمندیں کھولانی ترسینگ ءُ مرگ ءَ پد پہ زور آیانی منارینگ ءِ جھد کنگ بوتگ۔
گل ءَ لوٹ کرتگ کہ امرجان بلوچ، زاکر بلوچ ءُ نیاز بلوچ ءِ کوش ءِ بابت ءَ پٹ ءُ پول کنگ بہ بیت ءُ اے ویل ءَ ھواریں مردم کانود ءِ رد ءَ جست گرگ بہ بنت۔
بنشون: درشان اکس: پانک