بلوچ ریپبلکن گارڈ ( بی آر جی ) ءِ جارکش دوستین بلوچ ءَ وتی درشان ءَ گوشتگ کہ بی آر اے ءِ گوریلا شھری یونٹ پرویز اربن وارئیرز ءَ بلوچستان ءُ سند ءِ جتائیں ھنداں کاروائی کرتگ۔
آئی ءَ گوشتگ کہ 6 مارچ ءِ شپ ءَ پرویز اربن وارئیرز ءَ ٹنڈو مستی ھان، ھیرپور سند ءَ مال گاڑی ءُ ریل ءِ ٹریک گوں بمب ءَ نشانگ کرتگ کہ ایشی آسر ءَ مالی گاڑی چہ پٹڑی ءَ درکپتگ ءُ ریلوے ٹریک سکا تاوان بوتگ۔پنچ مارچ ءَ سبی ءِ نزیکیں ھند گلو شھر سرجم ءَ دستیگ کرتگ۔ سرمچاراں پولیس تانہ ءَ ھوار سرکاری ماڑی ھم دستیگ کرتگ اَنت۔
جارکش ءَ گوشتگ کہ سرمچاراں گلو شھر ءَ پولیس تانہ ءِ درسیں کارمند دزگیر کرتگ اَنت ءُ سلاہ ءُ آدگہ پوجی سامان زرتگ اَنت۔ رند ءَ پولیس کارمند بلوچ ءُ انسانیت ءِ بنیاد ءَ کڈن کنگ ءَ پد یل داتگ اَنت۔ سرمچاراں سرکاری گاڑی مانداشتگ اَنت، سلاہ، موٹر سائیکل ءُ آدگہ پوجی سامان زرتگ اَنت۔ھمے روچ ءَ سرمچاراں تانہ ءِ دستیگ کنگ ءَ پد لونی دگ بستگ ءُ گاڑی پٹ اتگ اَنت۔ سرمچاراں ناڑی دگ بستگ ءُ گاڑی پٹ ءُ پول کرتگ اَنت۔
آئی ءَ گوشتگ کہ ھمے میان ءَ سبی ءِ نزیک ءَ ناڑی گاج ءَ ریلوے ٹریک گوں تراکناکیں شورھاں تباہ کرتگ۔ ھمے وڑ ءَ بلوچستان ءِ دمگ کچی ءِ ھند ڈاڈر تا گنداواہ ءَ دگ بستگ ءُ گاڑی پٹ اِتگ اَنت۔
جارکش ءَ گوشتگ کہ 4 مارچ ءِ شپ ءَ سرمچاراں سبی ءِ ھند لمجی ءَ زورگریں پاکستانی پوج ءِ چوکی ءِ سر ءَ گوں گرنیڈ لانچراں ارش کرتگ۔ گرنیڈ لانچر ءِ گولا وتی نشانگ ءَ کپتگ اَنت، ایشی آسر ءَ دژمن ءِ ھپت کارمند مرتگ۔ ھمے میان ءَ سرمچاراں بائی پاس ءَ شھدگ بستگ گاڑی سرجم ءَ پٹ ءُ پول کرتگ اَنت۔ 4 مارچ ءِ شپ ءَ سرمچاراں نسیر آباد ءِ مزنیں شھر ءَ ڈیرہ مراد جمالی ءَ ایس پی ھائی وے کارگس ءِ نزیک ءَ پولیس کارمندانی سر ءَ دستی بمب ارش کرتگ۔ایشی آسر ءَ دو ٹپی بوتگ۔
آئی ءَ گوشتگ کہ 3 مارچ ءِ شپ ءَ بی آر جی ءِ پرویز اربن وارئیرز ءَ نسیر آباد ءِ شھر ڈیرہ مراد جمالی ءَ زورگریں پوج ءِمزنیں بنجل ءِ سر ءَ گوں مزنیں سلاھاں ارش کرتگ۔ ارش داں دیر ءَ برجاہ بوتگ، اے میان ءَ باز گولا آس داتگ کہ بنجل ءِ تہ ءَ نشانگ ءَ کپتگ اَنت۔ ایشی آسر ءَ پنچ پوجی مرتگ ءُ باز ٹپی بوتگ۔ ھمے شپ ءَ سرمچاراں نسیر آباد ءِ ھند چھتر ءِ نزیک ءَ سونواہ ءَ پاکستانی پوج ءِ چوکی ءِ سرءَ گوں مزنیں سلاھاں ارش کرتگ، ایشی آسر ءَ شش کارمند مرتگ ءُ باز ٹپی بوتگ۔
جارکش ءَ گوشتگ کہ ھمے شپ ءَ سرمچاراں سبی ءِ ھند مٹھڑی ءِ نزیک ءَ بائی پاس ءَ دگ بندی کرتگ ءُ گاڑی پٹ اتگ اَنت۔ ھمے میان ءَ پاکستانی پوج ءِ یک چوکی یے ءِ سر ءَ چہ سکا نزیک ءَ ارش کرتگ۔ سرمچاراں گرنیڈ لانچر ءُ آر پی جی ءِ باز گولا آس داتگ کہ بنجل ءِ تہ ءَ کپتگ اَنت ءُ کوکار بوتگ۔ اے کاروائی ءَ دژمن ءِ نُھ کارمند مرتگ ءُ باز ٹپی بوتگ۔
آئی ءَ گوشتگ کہ 3 مارچ ءِشپ ءَ سرمچاراں سبی ءِ ھند بکتیار آباد شھر ءَ پاکستانی پوج ءِ مزنیں بنجل ءِ سر ءَ مزنیں ارشے کرتگ، اے میان ءَ باز گرنیڈ لانچر ءُ آر پی جی ءِ گولا آس داتگ کہ بنجل ءِ تہ ءَ کپتگ اَنت۔ ایشی آسر ءَ دژمن ءِ پنچ کارمند مرتگ ءُ باز ٹپی بوتگ۔چہ ایشی ءَ پد پروش وارتگیں دژمن ءَ لس آبادی ءِ سر ءَ تیر گواری کرتگ۔
جارکش ءَ گوشتگ کہ ھمے شپ ءَ سرمچاراں سبی شھر ءَ ڈی آئی جی ءِ گس نشانگ کرتگ، ایشی آسر ءَ ماڑی سکا تاوان بوتگ۔جانی تاوان ءِ ھال نیست۔ ھمے شپ ءَ سرمچاراں کچی ءِ ھند ڈاڈر ءَ لوکل گورنمنٹ کارگس ءِ نزیک ءَ پولیس ءِ سر ءَ دستی بمب ارش کرتگ۔
آئی ءَ گوشتگ کہ 1 مارچ ءَ سرمچاراں بلوچستان ءِ دمگ سبی ءَ ارنڈ ءَ زورگریں پاکستانی لیویز تانہ دستیگ کرتگ ءُ درسیں سرکاری سلاہ پل اتگ اَنت ءُ لیویز کارمند دزگیر کرتگ اَنت۔ رند ءَ بلوچ ءُ انسانیت ءِ بنیاد ءَ یل داتگ اَنت۔ ھمے میان ءَ پہ کمک ءَ آھوکیں زوگریں پوج ءِ سے گاڑیانی کاروان ءِ سر ءَ سرمچاراں سنگر گپتگ ءُ یک گاڑی گوں تراکناکیں شورھاں تباہ کرتگ۔ ایشی آسر ءَ پنچ کارمند مرتگ،دگہ دو گاڑی چہ سکا نزیک ءَ نشانگ کرتگ ءُ تاوان داتگ۔
جارکش ءَ گوشتگ کہ بی آر جی ءِ شھری یونٹ پرویز اربن وارئیرز ءَجتائیں ھنداں 19 کاروائیانی مشن گوں سوبمندی ءَ آسر کرتگ ءُ درسیں سرمچار پہ سلامتی وتی بندراں سر بوتگ اَنت۔
دوستین بلوچ ءَ درشان ءِ گڈی ءَ درسیں ارشانی زمہ واری من اِتگ ءُ گوشتگ کہ داں بلوچستان ءِ آجوئیءَ دژمن ءِ بگیری ءَ کاروائی برجاہ بنت۔
بنشون: درشان اکس: زرمبش
