شال: پہ زوربیگواھیں مردمانی پد جنگ ءَ وائس پار بلوچ مسنگ پرسنز(وی بی ایم پی) ءِ زھرشانی گدان ءَ 6098 روچ سرجم بوتگ کہ گل ءِ چیرمین نسراللہ بلوچ ءِ سروکی ءَ شال پریس کلب ءِ دیم ءَ برجاہ بوتگ۔
چہ جتائیں بھرگاں سیادی داروکیں مردم گدان ءَ آتکگ اَنت ءُ گوں زوربیگواھیں مردمانی کھولاں ھمدردی درشان کرتگ ءُ زوربیگواھیانی بگیری ءَ زھرشانی کرتگ۔ زھرشانی ءَ ھواریں مردماں بیگواھیں مردمانی درکانودی کوش ءُ زوریں بیگواھی ءِ ھلاسی ءِ لوٹ کرتگ۔
اے درگت ءَ ابدلرزاک پرکانی ءِ کھول ءَ گوں وی بی ایم پی ءَ رھوت کرتگ ءُ گوشتگ کہ ابدلرزاک پرکانی ء ابدلگنی کہ مچ ءِ دمگ کچی مری آباد ءِ جھمنند اِنت۔ پاکستانی پوج ءَ ھمے سال ءِ دہ جنوری ءَ چہ ابدلگپار کلندرانی پٹرول پمپ آوار جتگ ءُ بیگواہ کرتگ۔
کھول ءَ گوشتگ کہ ما پہ ابدلرزاک ءِ آوارجنی سوب ءِ جست ءُ پرس ءَ باز رند ءَ گوں انتزامیہ ءَ رھوت کرتگ۔ بلے نہ کہ مارا ابدلرزاک ءِ آوار جنگ ءِ سوب گوشگ بوگ ءَ اِنت ءُ نہ آئی سلامتی ءِ بابت ءَ مارا سرپدی دیگ ءَ اَنت۔چہ ایشی ءَ مئے سرجمیں کھول سکا جنجالانی دیمپان اِنت۔
نسراللہ بلوچ ءَ کھول دلجمی داتگ ءُ گوشتگ کہ ما چہ گل ءِ نیمگ ءَ ابدلرزاک ءِ کیس ءَ داں سرکار ءَ سر کنگ ءَ وتی کرد ءَ پیلو کن ایں ءُ پہ آئی آجوئی ءَ ھمک جاہ ءَ توار چست کن ایں۔
نسراللہ بلوچ ءَ گوں سرکار ءَ لوٹ کرتگ کہ آ ابدلرزاک ءَ ھوار پہ درسیں بیگواھیں مردمانی آجوئی ءَ دلجمی بہ دنت۔ اگاں کسے ءِ سر ءَ چونیں ھم بھتامے ھست گڑا آمیدگس ءَ پیش کنگ بہ بنت ءُ آیاں کانود ءِ رد ءَ وتی بے میار پدر کنگ ءِ ھک دیگ بہ بیت۔ دانکہ آیانی کھول چہ اے زوربیگواھی ءِ جنجالاں بہ رک اَنت۔
بنشون: درشان. اکس: وی بی ایم پی
