بلوچ اسٹوڈنٹس ایکشن کمیٹی ءِ بنجاھی جارکش ءَ وتی درشانے ءَ گوشتگ کہ جھان ءِ تہ ءَ مدام جتائیں سیاسی لیکہ بنت، ءُ لبزانک سیاسی ءُ چاگردی تک ءَ زانشت ودی کنگ ءَ یک جوانیں بنشونے زانگ بیت۔
آئی ءَ گوشتگ کہ نبشتہ کار وتی نبشتانکانی رد ءَ مردمانی تجربہ، چاگرد ءِ جیڑہ ءُ راج ءِ سوبمندی ءَ ھما وڑ ءَ پیش کن اَنت کہ ھمک مردم گوں ازرانی ءَ سرپد بیت۔آ ھیال ءُ جوزگاں تچک ءُ سادگیں زبانے ءَ پیش کن اَنت۔ بلوچ نبشتہ کاراں نہ تھنا پہ وانوکاں ھیالانی سرپد بوگ ارزاں کرتگ، بلکیں پہ مئے راجی دیمروئی ءَ جتائیں بنگپ لبزانک ءَ را داتگ۔
آئی ءَ گوشتگ کہ بلوچ لبزانک ءَ انوگیں ھیال ترتیب داتگ اَنت ءُ تچک کرتگ کہ نبشتہ کنگ جھد، سرپدی ءُ راجی دیمروئی ءِ جوانیں بنشونے۔
آئی ءَ گوشتگ کہ ما نودربر گلے ءِ بستار ءَ بلوچ نبشتہ کار ءُ دانشوراں شرپ بکش این ءُ آیاں دلبڈی دے ایں۔ ما بلوچ نبشتہ کار ءُ اھوالکار شھید ساجد ھسین ءَ ستک شانی ندر کن ایں کہ آئی چہ وتی ند ءِ پارست ءَ بلوچ سیاسی جھد ءَ را لیکھی دروشمے داتگ۔
بنشون: درشان. اکس: مونوگرام
