بلوچ نیشنل موومنٹ ( بی این ایم ) نیدرلینڈز چیپٹر ءِ شش ماھی دیوان چیپٹر ءِ سروک مھیم ابدرھیم بلوچ ءِ سروکی ءَ برجم دارگ بوتگ، پارٹی ءِ جونیئر جوائنٹ سکریٹری ھسن دوست دیوان ءِ گچینی مھمان بوتگ۔دیوان ءِ جارچینی زمہ واری وھید بلوچ ءَ گوں بوتگ اَنت۔
بی این ایم نیدرلینڈز چیپٹر ءِ کارگشاد دیدگ بلوچ ءَ شش ماھی کارانی رپورٹ پیش کرتگ ءُ شش ماہ ءَ بوتگیں ھمک زھرشانی، سپارتی گند ءُ نند، پٹیشن، دیوان ءُ سرپدی مھم ءُ درسیں کار دیوان ءِ دیم ءَ ایر کرتگ اَنت۔ چہ ایشی ءَ پد بھار بلوچ ءَ پنانس ءِ رپورٹ ھم پیش کرتگ۔
رپورٹ ءَ گوشگ بوتگ کہ گوستگیں شش ماھانی میان ءَ بلوچستان ءَ برجاھیں انسانی ھکانی لگتمالی ءُ زوریں بیگواھی ءِ جیڑہ ءِ سر ءَ یورپی سرڈگار ءَ یکشل ءَ توار چست کرتگ۔ ڈچ پارلیمنٹ ءَ پٹیشنے یاداشت کرتگ ءُ یورپی یونین ءِ جھگیراں ھوار گوں جتائیں میان استمانی انسانی ھکانی ادارھاں گند ءُ نند کرتگ۔
آئی ءَ گوشتگ کہ چہ اکسانی پیش دارگ ءُ پمپلٹ ءِ رد ءَ ھندی مردم بزاں ڈچ شھریان ءَ بلوچ ءِ جیڑھانی بابت ءَ سرپدی داتگ۔ پہ کارکنانی سیاسی ھیلکاری ءَ آن لائن ءُ دیوان ھم برجم داشتگ، جست، آھوکیں گامگیج ءُ شرگداری ھم ھوار بوتگ اَنت۔
دیوان ءِ گچینی مھمان پارٹی ءِ بنجاھی جونیئر جوائنٹ سکریٹری ھسن دوست ءَ تران کرتگ ءُ گوشتگ کہ پہ بلوچ راجی زرمبشت ءِ مھکم کنگ ءَ مارا دو بنیادی چیزانی سر ءَ دلگوش دیگی اِنت، یکے گل ءِ راھبند ءُ دومی ڈیجیٹل پڑ اِنت۔
آئی ءَ گوشتگ کہ میان استمانی جھان ءَ زرمبشت ءِ سوبمندی گوں مھکمیں گل ءِ بنیاد ءَ بندوک اِنت۔ پمشکا کارکن وتی درسیں توان ءَ گوں گل ءِ راھبند ءَ بہ کن اَنت ءُ دانکہ یک مھکمیں توارے جوڑ بہ بنت ءُ میان استمانی ادارھاں دلگوش بدے اَنت۔
آئی ءَ گوشتگ کہ چاگردی رسانکدر اے وھد ءَ یک مزنیں سلاھے۔ کارکن اے پڑا سکا سرگرم بہ بنت۔ اے ھمک کارکن ءِ زمہ واری بیت کہ آ بلوچستان ءَ بیوکیں زوراکیاں گوں منانکاں رسانکدر ءِ پڑا دیم ءَ بیار ایت۔
دیوان ءَ چیپٹر ءِ سروک مھیم ابدرھیم تران کرتگ ءُ گوشتگ کہ ڈنی ڈیھاں مارا کار کنگ ءُ وتی لیکہ میان استمانی تک ءَ مھکم کنگی اِنت۔ اگاں ما گوں ھمے درچ ءَ میان استمانی ادارھاں سر بہ بہ ایں گڑا بلوچ ءِ جیڑہ ءَ شریں وڑے ءَ پیش کرت کن ایں۔
بنشون: درشان. اکس: مونوگرام
