بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَ دو مارچ بلوچ دود ءُ ربیدگی روچ ءِ درگت ءَ وتی درشانے ءَ گوشتگ کہ اے روچ پہ بلوچ راج ءَ یک گوستانکے نہ اِنت، بلکیں یک ٹپے ءِ یاد کنگ اِنت۔
آئی ءَ گوشتگ کہ 2 مارچ 2020 ءَ چہ سویڈن ءِ شھر اپسالا ءَ درانڈیھیں اھوالکار ساجد ھسین بیگواہ کنگ بوتگ، آ اھوالکار چہ پاکستان ریاست ءِ زوراکیاں رک اِتگ ءُ یورپ ءَ سر بوتگ، ھمے اوست ءَ کہ کم چہ کم اود ءَ زند گوازینگ ءُ گپ جنگ ءِ ھک رس ایت۔
ڈاکٹر نسیم بلوچ ءَ گوشتگ کہ اود ءَ ھم آ پھریز نہ بوت، بازیں ھپتگاں بے تاھیری، جست ءُ ترس ءَ پد آئی لاش چہ اپسالا ءِ یک دریایے ءَ دزکپتگ۔
آئی ءَ گوشتگ کہ 2 مارچ ھمک سال ءَ ھمے راستی ءِ ترانگ ءَ گیج ایت کہ زوراکی تھنا گوں سیمسراں بندوک نہ اِنت ءُ زوریں بیگواھی تھنا بلوچستان ءِ تھاریں دمکانی تہ ءَ نہ اِنت، بلکیں یک بگیریں توارے ءِ یورپ ءَ ھم بے توار کنگ ءِ کوشست کنگ بیت۔
بی این ایم ءِ چیئرمین ءَ گوشتگ کہ ساجد ھسین تھنا ھوالکارے نہ بوتگ، بلکیں بلوچ راج ءِ دردانی نبیسوکے اَت۔ آئی ءَ زوریں بیگواھی، درکانودی کوش ءُ انسانی ھکانی بگیری جھان ءِ دیم ءَ پاشک کرتگ اَنت ءُ بے توار، توار جتگ اَنت۔
ڈاکٹر نسیم بلوچ ءَ گوشتگ کہ 2 مارچ تھنا پرسیگ بوگ ءِ روچ نہ اِنت، بلکیں جست ءِ لوٹ ءَ کنت۔ ھمے ترانگ ءَ گیج ایت کہ ساجد ھسین ءِ کیس سپارتی بے تواری یا کچ ءُ کساسانی تہ ءَ بیگواہ بہ بیت۔ آئی بیگواھی ءُ مَرگ انچائیں ویلے نہ اِنت بلکیں دراجکشیں درچے ءِ بھر اِنت۔ ھما درچ کہ آئی مول بگیریں توارانی دارگ اِنت، اگاں آ کج ءَ بہ بنت۔
درشان ءِ گڈی ءَ گوشگ بوتگ کہ ساجد ھسین ءِ توار ءَ بیگواہ بوگ ءَ نیل ایں۔
بنشون: درشان. اکس: دامگ
