بلوچ اسٹوڈنٹس آرگنائزیشن آزاد ءِ جارکش شولان بلوچ ءَ وتی درشان ءَ گوشتگ کہ بلوچ راج دو مارچ ءَ بلوچ دود ءُ ربیدگی روچ ءَ بلوچستان ءَ ھوار سرجمیں جھان ءَ گوں شرپ ءَ دار ایت۔ بلوچ یک کوھنیں راجے کہ وتی سرڈگار ءِ سر ءَ چہ کرناں آباد اِنت۔ چہ کرناں آبادیں اے راج ءِ وتی جتائیں راجی دودمانے ایشی جھان ءِ تہ ءَ یک راجی پجارے ھست۔ دود ءُ ربیدگاں ھواریں بلوچیت، بلوچ راج ءِ زند گوازینگ ءِ کانود ءُ چاگردی دستور ءِ نام اِنت۔ ھمے بلوچیت ءِ رندگیری کرتگ ءُ بلوچاں وتی چاگردی بنیادے ایر کرتگ ءُ وتی چاگرد ءِ تہ ءَ دودمانے ٹھینتگ۔
آئی ءَ گوشتگ کہ دودمان تھنا پیش دارگی چیزانی نام نہ اِنت، بلکیں انسانی رویشت ءُ گوں تب ءَ بندوکیں چیزے کہ آ چاگرد ءِ تہ ءَ یک جاھے بکش ایت۔ بلوچ گوستانک مارا ھمے گوش ایت کہ مئے دودمان ءَ زوراکی ءِ بگیری ءَ گھگیری، گوں راج ءُ سرڈگار ءَ مھر، مھمانجلی، میارجلی، وتیگانی کمک ءُ گوں آدگہ مھلوک ءَ ھوار اِنت کہ بلوچ راج چہ کرناں ھمے کار ءَ کنگ ءَ اِنت۔ چہ ھمل ء جیھند ءَ بگر داں مھراب ھان، لمہ کریمہ ءَ داں شاری ءَ ھزارانی کچ ءَ کردانی داستان ھست اَنت کہ آیاں گھگیری کرتگ ءُ وتی راجی دودمان پھریز اتگ۔
شولان بلوچ ءَ گوشتگ کہ بلوچ راج پہ پھر ءُ شان ءَ زندگیں راجے اِنت۔ ھما راج کہ وتی دودمان ءِ سر پھر بند ایت ءُ دوست دار ایت گڑا آ راج ھلاس کنگ نہ بیت، پمشکا بلوچستان ءَ چنچو دری ارشکار اتکگ اَنت ءُ بلوچانی دودمان ءِ ھلاس کنگ ءِ جھد کرتگ آ گڈی ءَ بے سوب بوتگ۔ مرچی بلوچ راج ءَ چہ زورگریں پاکستانی ریاست ءَ دودمان ءِ ھلاسی ءِ دیمپانی اِنت، اود ءَ زوراک ءُ ریاست بلوچانی زبان، دود ربیدگ، چاگردی بنیاد، تب ءَ ھوار درسیں بھرگانی ھلاسی ءِ کوشست ءَ اِنت۔ گوستانک ءِ تہ ءَ درسیں ریاستانی ھمے پالیسی بوتگ ایشی مرچی زورگریں پاکستانی ریاست برجاہ دارگ ءَ اِنت۔
آئی ءَ گوشتگ کہ دو مارچ بلوچ دود ءُ ربیدگی روچ ءِ درگت ءَ ما بلوچستان ءِ دراجکشیں سرڈگار ءِ سر ءَ جاہ منندیں بلوچ مھلوک ءِ سر ءَ پھر بند ایں کہ آیاں اے گرانیں زورگپتی دور ءَ وتی دود ءُ ربیدگی ھمک روچی بنیاد پھریز اتگ ءُ آئی گرانکدریں پسگاں ستک شانی ندر کن ایں کہ آیاں پہ بلوچ راجی دودمان ءِ پاسداری ءَ وتی جانانی دیمونی داتگ۔ بلوچ راج ءِ ورنا ھما درسیں کرداں پہ مادنیں کشکے ءِ رد ءَ پچار اَنت ءُ وتی دودمان ءَ زندگ بدار اَنت ءُ جھد بہ کن اَنت چی ءَ کہ دودمان ءِ زندگ دارگ پدریچ ءِ مانزمانی اِنت۔
بنشون: درشان. اکس: مونوگرام
