بلوچ وومن پورم ءِ سروک ڈاکٹر شلی بلوچ ءَ وتی درشانے ءَ گوشتگ کہ گوں ڈاکٹر ماہ رنگ بلوچ ءَ برجاہ داشتگیں در انسانی رویشتاں گوں ترندیں دانکاں ایر جن آں۔
آئی ءَ گوشتگ کہ چونیں ھم انسانے ءَ چہ بنکی انسانی ھک ءُ الاج ءِ آسراتی ءَ زبھر کنگ نہ تھنا دودمانی پارست ءَ ایرجنگی اِنت، بلکیں اے انسانی واک ءُ آئین ءِ لوٹانی بگیری اِنت۔ یک شرپمندیں چاگردے ءَ بندیگیں مردمے ءَ درسیں بنکی ھک دیگ بنت، جاندراھی بنداتی لوٹ اِنت۔
ڈاکٹر شلی بلوچ ءَ گوشتگ کہ ڈاکٹر ماہ رنگ بلوچ اے وھد ءَ یک کیسے ءِ دیمپان اِنت ءُ کانود ءِ رد ءَ آ یک میاربارے، دانکہ آئی سر ءَ میار سرزد مہ بیت آ بے میار گوشگ بیت۔ چہ ایشی ءَ ابید آئی ءَ بنکی ھک الاج ءِ چہ آسراتی ءَ زبھر کنگ ناھکیانی گیش کنگ اِنت۔ جان سلامتی ھمک انسان ءِ بنکی ھک اِنت، اے ھچ وڑ ءَ پلگ نہ بیت۔
آئی ءَ لوٹ کرتگ ءُ گوشتگ کہ ڈاکٹر ماہ رنگ بلوچ زوت الاج کنگ بہ بیت۔ زانوگریں ڈاکٹران ءَ پیش دارگ بہ بیت ءُ شریں نادراھجاھاں پہ آئی الاج ءَ دلجمی دیگ بہ بیت۔ انسانی ھمدردی، انساپ ءُ کانود ءِ لوٹ پیلو کنگ بہ بنت گوں ھچ پیم ءَ زوراکی کنگ مہ بیت۔
ڈاکٹر شلی بلوچ ءَ گوشتگ کہ انسانیت چہ ھر چیز ءَ دیم ءَ اِنت ءُ انسانی ھکانی شرپ کنگ ھمک ریاست ءُ آئی ادارھانی بنداتی پرز اِنت۔
بنشون: درشان. اکس: دامگ
