بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ وتی درشان ءَ گوشتگ کہ بی ایل ایپ ءِ سرمچاراں 23 پروری 2026 ءَ پنجگور ءِ ھند دستک ءَ دگ بستگ۔ روچ ءِ یک ءُ نیم ءَ چہ بگیریں نیمگے ءَ یک سرپ ءُ دو ویگو گاڑی دگ بندی ءِ جاہ ءَ سر بوتگ اَنت، سیمی گاڑی باز دور بوتگ۔ گاڑیاں سواریں درسیں مردم سلاہ بند بوتگ اَنت۔ سنگر گپتگیں سرمچاراں پہ اوشتگ ءَ دست داتگ ءُ گوں ترندیں توار ءَ گوشتگ کہ ما سرمچار ایں وتی پجار ءَ بہ کن اِت۔ سلاہ بندیں مردماں چہ وتی پجار ءِ گوشگ ءِ جاہ ءَ گھگیری کرتگ ءُ سرمچارانی سر ءَ تیرگواری بندات کرتگ۔ سنگر گپتگیں سرمچار رک اتگ اَنت۔
آئی ءَ گوشتگ کہ پہ تیرگواری ءِ پژدر ءَ سرمچاراں زوت پہ وتی پھریزگ ءَ جوابی کاروائی کرتگ ءُ دوئیں گاڑی نشانگ کرتگ اَنت۔ ایشی آسر ءَ دوئیں گاڑیاں سواریں درسیں شش سلاہ بندیں مردم جاھی مرتگ اَنت، سیمی گاڑی کہ دور بوتگ آئی چہ کوھے ءَ سنگر گپتگ ءُ تیرگواری کرتگ ءُ جستگ۔
جارکش ءَ گوشتگ کہ سرمچاراں سوبمندیں کاروائی ءَ پد مرتگیں مردمانی درسیں سلاہ زرتگ اَنت، آیانی تہ ءَ یک روسی ایل ایم جی، پنچ سی تیری ءُ یک امریکی توپکے ھوار بوتگ۔ سلاہ بندیں مردمانی یک گاڑی یے جنگ ءِ میان ءَ چہ گولا ءِ لگگ ءَ سرجم ءَ ستکگ ءُ تباہ بوتگ، دومی گاڑی سرمچاراں مانداشتگ۔
آئی ءَ گوشتگ کہ بی ایل ایپ ءَ اے ویل ءَ پد کشگ بوتگیں سلاہ بندیں مردمانی پجارگ ءِ بابت ءَ پٹ ءُ پول بندات کرتگ گڑا رسانکدر ءَ جیش الادل ءِ نام ءَ سرگرمیں ٹولی یے ءِ درشان گندگ بوتگ کہ آئی اے مردم وتی باسک لیک اتگ اَنت ءُ بی ایل ایپ ءِ بگیری ءَ بے بنیں بھتام جتگ۔
جارکش ءَ گوشتگ کہ جیش الادل نامیں اے سلاہ بندیں ٹولی چہ پنجگور، پنچی ءَ بگر داں چیدگی سیمسر ءَ بزاں سیمسری ھنداں بگدر، سوراپ، سوراپ تنک ءِ راہ، جوانگر، نکر ءُ گوردکان ءَ زورگریں پاکستان ریاست ءِ کمکار جوڑ بوتگ اَنت ءُ پاکستانی پوج ءِ چیردستی ءَ درسیں راھانی سر ءَ دارگ ءِ جھد ءَ کنگ ءَ اِنت۔
آئی ءَ گوشتگ کہ جیش الادل ءِ سلاہ بندیں مردم نہ تھنا نشہ ءِ کاچاکی ءَ راھاں پھازداری کن اَنت، بلکیں بلوچ چکچینی ءِ زمہ واریں پاکستانی ملٹری انٹیلیجنس( ایم آئی ) ءِ سروکی ءَ چیدگی سیمسر ءَ رائج پیکج سسٹم ءِ گرگ ءُ دیگ ءَ ھمک روچ 120 گاڑیانی کاروان ءِ چہ سیمسر ءَ گوازینگ ءِ کمکاری ءَ کنگ ءَ اَنت۔
میجر گھرام بلوچ ءَ کاروائی ءِ زمہ واری من اِتگ ءُ گوشتگ کہ سلاہ بندیں گل جیش الادل ءَ کڈن کن ایں کہ رودرآتکی بلوچستان ءَ بلوچانی کشندہ پاکستانی پوج ءُ ایم آئی ءِ گون ءَ ھمگرنچ ءُ بلوچ راجی زرمبشت، بی ایل ایپ ءِ بگیریں کاراں یل بہ کنت۔ ما گوں بلوچ مھلوک ءَ لوٹ کن ایں کہ دگ بندیانی میان ءَ سرمچارانی گون ءَ کمک بہ کن اِت دانکہ بدگمانی ءُ شک ءِ بنیاد ءَ کسےءَ جانی ءُ مالی تاوان مہ بیت۔
بنشون: درشان اکس: زرمبش
