کیچ ءَ دوشی پاکستانی پوج ءَ بلوچ نیشنل موومنٹ ( بی این ایم) ءِ بنجاھی پنانس کارگشاد ناسر بلوچ ءِ گس ءَ بیڑ برتگ ءُ گوں کھول ءِ مردماں زوراکی کرتگ۔
زرمبش جھگیر ءِ رد ءَ پاکستانی پوج ءَ دوشی دوازدہ ءَ بازیں کچے ءَ کیچ ءِ ھند بُگ ءَ بیڑ برتگ ءُ داں شپ ءِ دو ءَ گس پٹ ءُ پول کرتگ اَنت ءُ گوں کھول ءِ مردماں زوراکی کرتگ۔ پوج ءَ ناسر بلوچ ءَ ھوار آئی کھول ءِ آدگہ مردمانی گس ھم پٹ ءُ پول کرتگ اَنت۔
اھولکار ءِ گوشگ اِنت کہ پاکستانی پوج ءَ مردمانی موبائل پل اِتگ اَنت ءُ گسانی آدگہ گرانھادیں سامانی ھواری ءَ موٹر سائیکل ءُ گاڑی ھم برتگ اَنت۔
آئی گوشگ اِنت کہ اے کھول چہ 2013 ءَ یکشل ءَ پاکستانی پوج ءِ زوراکیانی آماچ اِنت۔ 25 مئی 2025 ءَ ھم پاکستانی پوج ءَ بیڑ برگ اَت ءُ ناسر بلوچ ءِ گوھارزتک جیھند لیاکت آوار جتگ ءُ بیگواہ کرتگ اَت۔جیھند لیاکت چار ماہ ءِ زوریں بیگواھی ءَ پد 7 دسمبر ءَ آجو بوتگ اَت۔
بنشون: زرمبش جھگیر. اکس: بی این ایم
