وائس پار بلوچ مسنگ پرسنز ( وی بی ایم اپی ) ءِ چیئرمین نسر اللہ بلوچ ءَ وتی درشان ءَ گوشتگ کہ چہ اسلام آباد ءَ بلوچ نودربر نبیل ارمان ءِ زوریں بیگواھی ءَ بژنیگ این ءُ آئی زوتیں آجوئی ءِ لوٹ ءَ کن ایں۔
آئی ءَ گوشتگ کہ اسلام آباد ءَ نشتگیں بلوچ نودربرانی رد ءَ چارشمبے ءِ بیگاہ ءَ اسلام آباد ءَ سیکٹر G-7 ءَ چہ آئی سنگتانی یک کارگسے ءَ پجار نہ بوتگیں مردماں آوار جتگ ءُ برتگ، چہ ایشی ءَ پد آئی ھچ وڑیں ھال نیست۔
نسر اللہ بلوچ ءَ گوشتگ کہ نبیل ارمان نمل یونیورسٹی ءِ گریجویٹ ءِ نودربرے۔ نودربر گلانی گوشگ اِنت کہ آ ڈیھ ءِ ادارھانی کارمنداں آوار جتگ، چہ ایشی ءَ پد آ بیگواہ کنگ بوتگ۔
وی بی ایم پی ءِ چیئرمین ءَ پاکستان ءِ بنجاھی شھر اسلام آباد ءَ نبیل ارمان پجار نہ بوتگیں مردمانی دست ءَ زوریں بیگواھی ءِ سر ءَ بژن درشان کرتگ ءُ گوں سرکار ءَ لوٹ کرتگ کہ آ پہ بلوچ نودربر ءِ آجوئی ءَ دلجمی بہ دے اَنت۔
بنشون: درشان اکس: رسانکدر
