بلوچ نیشنل موومنٹ ( بی این ایم ) ءِ بنجاھی پتر ءِ پنچمی دیوان چئیرمین ڈاکٹر نسیم بلوچ ءِ سروکی ءَ برجم دارگ بوتگ۔ دیوان ءَ بنجاھی کمیٹی ءِ ھالیگیں جاہ ءِ گچین کنگ، دری کارانی تک، انسانی ھکانی تک، رسانکدی تک ءُ گھبودی تک ءِ کارانی رپورٹ پیش کنگ بوتگ اَنت۔
گل ءِ کار، پارٹی ءِ پنانس، بلوچستان ءُ دمگ ءِ سیاسی جاور ءُ پاکستان ریاست ءِ نیمگ ءَ انوگیں شنگ بوتگیں جار ءَ مچی سزا ءِ پالیسی ءِ سر ءَ گپ ءُ تران کنگ بوتگ۔ دیوان ءَ گل ءُ سیاسی جوانیں پیسلہ زورگ بوتگ۔
دیوان ءَ چیئرمین نسیم بلوچ ءَ تران کرتگ ءُ گوشتگ کہ بلوچ راج اے وھد ءَ گنتریں انسانی ھکانی لگتمالیانی دیم پہ دیمی ءَ کنگ ءَ اِنت۔ مرچی پاکستان ءِ نیمگ ءَ بلوچ راجی چکچینی، زوریں بیگواھی، درکانودی کوش، کشگ ءُ چگل دیگ، مچی سزا، پہ زور لڈینگ ءِ وڑیں زوراکیانی دیمپان اِنت۔
آئی ءَ گوشتگ کہ مرچی چہ گنتریں جاوراں ابید بلوچ راج گوں وتی راجی زرمبشت ءَ ھمگرنچ اِنت ءُ یکشل ءَ دیمونی دیگ ءَ اِنت۔ چہ بیست ءُ پنچ سالاں پوجی زور ءِ یکشل ءَ کارمرز کنگ ،راجی زرمبشت ءَ نزور ءُ ھلاس کنگ ءِ بے سوبیں جھدے کنگ ءَ اِنت، نوں چہ مچی سزا ءِ رد ءَ در انسانی گامگیج ءِ کمک ءَ زورگ ءَ اِنت۔
چیئرمین ڈاکٹر نسیم بلوچ ءَ گوشتگ کہ پہ راجی آجوئی ءِ ھک ءُ ریاستی ناشرکاریانی پیش کنگ ءَ میان استمانی تک ءَ وتی برجاھیں سرگرمیاں گیش کن ایں۔ پہ راجی آجوئی ءِ گرگ ءَ میان استمانی تک ءَ مھم ءَ تیز کن این ءُ میان استمانی رسانکدر، انسانی ھکانی گل ءُ پارلیمنٹاں بلوچستان ءِ کیس ءَ شریں وڑے ءَ پیش کن ایں۔
دیوان ءَ پارٹی ءِ کارگشاد دل مراد بلوچ ءَ گوشتگ کہ چونیں ھم راجی پارٹی یے ءِ پالیسی گوں وھد یا سروکانی وھد ءِ گون ءَ بندوک مہ بیت بلکیں یک راجی زرمبشت ءُ راجی پدریچے ءِ جھد ءِ پالیسی بہ بنت۔ مئے انوگیں سروکی ءِ وھد ھلاس بوگ ءَ اِنت، مارا وتی مرچیگیں ٹھینتگیں پالیسی داں سیشن ءَ بندوک کنگی نہ اَنت بلکیں زرمبشت ءِ آھوکیں بھرانی ھم بنیاد جوڑ بہ بنت۔
آئی ءَ گوشتگ کہ ما درس ھمے راجی زرمبشت ءِ بھر ایں۔ انوگیں بلوچ راجی جھد جتائیں سیاسی ءُ چاگردی بنیاداں ھواریں یک مزنیں زرمبشتے ۔ اے کار ءِ تہ ءَ ھمک پارٹی ءُ گل وتی گل ءِ پجار ءُ لیکہ ءِ رد ءَ آجوئیں کرد پیلو کنگ ءَ اِنت۔
گڈسر ءَ دل مراد بلوچ ءَ وتی گر ءُ دار کنگ ءِ سر ءَ زور داتگ ءُ گوشتگ کہ پارٹی ءَ وتی گل ءِ اگدہ ءُ باسکانی سیاسی کارانی سر ءَ گوں ایمانداری ءَ چارگی اِنت۔ مھکمیں سیاسی شوربندی ءُ شریں سپارتکاریءِ مھم مئے راجی لوٹ اِنت، چی ءَ کہ پہ ایشی دورچاریں شوربندی ھم زرمبشت ءَ مھکم کنت۔
بنشون: درشان اکس: بی این ایم
